Omulumenhu weedula 32 vati okwa xwika po eumbo lamumwainakadona ndele ta faduka po.
Oshiningwanima osha ningwa mexuliloshivike komukunda Okiimbi moshitukulwa shaShana lwopotundi 23h00.
Omukulunhu wopolifi moshitukulwa shaShana Komufala Naftal Sakaria okwa hokolola ta ti omufekelwa ova tokelwa kondingosho namumwainakadona.
Okudja opo vati omulumenhu ou okwa patela omukulu waye mondingosho nokonima okwa ya keumbo.
Ondingosho oya mumwainakadona i li pomukunda Onakamwandi.
Otaku hokololwa kutya eshi omulumenhu ou a fika meumbo okwa pendula ounona molwaashi okwa li va nangala mongulu oyo ya xwikwa po.
Okudja opo konima eshi ounona va dja mo omufekelwa okwa tomeka ongulu yomadimo ane ondalu yaNelyanga.
Omaliko ayeshe okwa pila mongulu noku li pongushu yoshimaliwa N$25 800.
Opolifi oya hokolola kutya omufekelwa oha di meumbo limwe nomukulu waye.
Fiyo opapa kape na ouyelele kutya omufekelwa oilonga ei ikumwifa oke i longela shike shaashi okwa faduka po.
Opolifi otai indile moshiwana kwaau e na ouyelele kombinga yomufekelwa ou opo shi lopotele opolifi keshe i li popepi.
Oshiningwanima shikwao, omukainhu weedula 25 okwa kwatwa onghonga komushiinda pefimbo kwa li a kofa.
Oshiningwanima osha ningwa komukunda Onendongo moshitukulwa shaShana.
Opolifi oya hokolola tai ti omufekelwa okwa ya monduda yomukianhu ndele te mu ningile omatilifo kutya ote mu dipaa nokuya naye moixulo.
Omufekelwa ina kwatwa po manga onghee omakonakono opolifi otaa twikile.
-fhamalwa@nepc.com.na