Omukiintu Omunamibia gwomimvo 42 opamwe nakuume ke komiihole gwomimvo 23 Omuzambia, oye li moshipangelo, anuwa ye li monkalo itaayi nuwa omeya, sho ya yahwa nondjembo komulumentu kwa li nale gwomukiintu ngoka.
Sha ikolelela kuuyelele wopolisi oshiningwanima shoka osha ningwa uusiku wOsoondoha, lwopotundi 21h00, momukunda Lisikili moshitopolwa shaZambezi.
Otaku hokololwa kutya omukiintu ngoka nomulumentu gwe oya monithilwa oshiponga megumbo lyawo momudhingoloko gwoKatima Mulilo.
Opolisi oya lopota kutya omulumentu ngoka okwa li a zi esiku ndyoka kondoolopa tayi ithanwa Kwena nelalakano lyimwe alike.
Otaku hokololwa kutya omulumentu ngoka a yi megumbo lyaaholathani mboka, nokuyaha omulumentu ngoka e li ohonda ompe yomukiintu metundji lyokolulyo. Okwa yaha wo omukiintu ngoka mokwaako kokokulyo.
Taku ti, omukiintu nguka nomulumentu gwe mboka oya falwa koshipangelo shaKatima Mulilo ye li monkalo ombwiinayi.
Opolisi otayi tsikile okukumagidha oshigwana shi hulithe po okulongelathana uuwinayi.
Ta yi ti, okulongelathana omiyonena kaku na shoka haku pondola, ihe ohaku eta ashike uupyakadhi uunene.
Opolisi oya pula wo opo oshigwana shi kala nokukonga omakwatho gehungomwenyo oshoka ohali kwatha mokukeelela omaupyakadhi gamwe, shi vulithe okumwena nokulonga iilonga inayi uka.
Moshiningwanima inaashi faathana naashika, omupolisi gumwe okwa li a hulithile moshiponga sho ohauto yobakie yoToyota C26 yopolisi moka ya li ya gu. Aapolisi yatatu naakwashigwana yatano oya hupu moshiponga moka.
Otaku hokololwa kutya oshiponga shoka okwa li sha ningwa konyala ookilometa 30 okuza moRehoboth kopate yoKlein Aub.
Sha ikolela kopolisi omuhingi gwohauto ndjoka, omupolisi, anuwa okwa li a nyengwa okupangela ohauto sigo ya gu.
Otaku hokololwa kutya okanopi okwa li ya gu ko, naafalelwa oya umbwa mo mohauto, noya li ya falwa koshipangelo.
Nakusa okwa ndhindhilikwa nedhina Sean Mbango (45).
– vkaapanda@nepc.com.na