Omulumenhu weedula 32 okwa tambulilwa moshipangelo shaNandjokwe konima eshi vati a yashwa mokuulu kopolifi.
Ota ku hokololwa omulumenhu ou a yashwa pefimbo a li a kufila mo ombele ovapolifi ovo vali tava kendabala oku mu kwata molwa oshikulumuna sheteyo leumbo. Oshiningwanima osha ningwa oshivike sha dja ko molukanda Okangwena mOndangwa efimbo lomutenya.
Omupopiliko wopolifi moshitukulwa shaShana Inspector Thomas Aiyambo okwa hokolola ta ti ovafekelwa vati hangika kumwene weumbo limwe molukanda, tava teya eumbo laye.
Opolifi vati eshi ya lopotelwa oshiningwanima osho, oya ya mokashoko, noku ya ovafekelwa vavali ovo va faduka po moku i mona.
Umwe womuvo vati okwa kanghama ndele ta kufa mo ombele yokapi a hala okutwa ovapolifi.
Eshi osha ka eta umwe womupolifi opo a umbe noku yasha omufekelwa umwe mokuulu.
Omufekelwa umwe ou kwa li e na ombele okwa kwatwa po, noku twalwa koshipangelo, oko e li a patululilwa oshibofa. Oshiningwanima shikwao, okakadona keedula 17 oka kwatwa onghonga momukunda Ohaiyandja moshitukulwa shaShana.
Opolifi oya hokolola tai ti okakadona oka li taka ende pomukunghulo wopate opo ka hanga ovalumenhu ve li motuwa.
Umwe womovalumenhu ovo okwa nuka mo motuwa e kwete ondjebo noku ningila okakadona omatilifo kutya ote ka dipaa.
Opolifi oya hokolola tai ti omufekelwa okwa nanena okakadona motuwa noku shinga fiyo oponhele opo eke ka kwata onghonga.
Ovafekelwa ovo vehe shivike inava kwatwa nomakonakono opolifi otaa twikile. – fhamalwa@nepc.com.na