Omulumenhu weedula 44 okwa xulifa konima eshi vati a yashwa nouta medimo kuwalye pefimbo kwa li e li ponhele opo tava longele navakwao.

Oshiningwanima osha ningwa Etivali molukanda Omashaka modoolopa yaNdangwa lwopotundi 19h00.

Opolifi oya ti ovakwapata vomulumenhu ou inava shivifilwa natango kombinga yefyo laye.

Komufala wopolifi moshitukulwa shaShana Commissioner Naftal Sakaria okwa hokolola ta ti nakuninga oshihakanwa okwa hangika ta popi mongodi konima yokatenda kavo kokunangala.

Ovalumenhu ava ova dika outenda popepi neumbo olo kwa li tava tungu.

Otaku hokololwa kutya omulumenhu ou okwa ka mona ashike a yashwa medimo ashike ina mona kutya olyelye a umba oshikuti.

Opolifi oya hokolola tai ti ovanailonga pamwe naye ova hangika ve lipyakidila tava teleke ouvalelo.

Otaku hokololwa kutya nakuninga oshihakanwa okwa ufana umwe womunailonga pamwe naye konima eshi a yashwa.

Okudja opo omulumenhu mukwao okwa endelela oku ya kuye ashike okwa hanga nale ita dulu okupopya e na oshikuti medimo.

Okwa twalwa koshipangelo shaNandjokwe opo a ka mone epango lopaunamiti.

Okwa xulifa mokati koufiku lwopotundi 01h30 pefimbo kwa li e li koshitandelo.

Nakufya oo edina laye inali tumbulwa natango, okwa dile komukunda Omahenge koshitukulwa shaHangwena.

Omakonakono opolifi otaa twikikile moshikungu omu. -fhamalwa@nepc.com.na