WINDHOEK – Ekuyunguto olya holokele metiyali mOmpangu yOpombanda mOvenduka sho ongundu yaalumentu 12 mboka taya fekelelwa ekuthombinga monkambadhala lyeumboko lyepangelo koshipundi – ano okutenda ko oshitopolwa shaCaprivi kuNamibia momumvo 1999 ya tindi okukutha ombinga miihokolola yepangulo lyekengelelo enene. Aafekelwa 12 mboka yi iteeka nokuza miihokolola yepangulo lyawo etiyali li nasha nokutenda oCaprivi oyo: Progress Munuma omunamimvo 40, Manepelo Makendano, 41, Shine Samulandela, 36, Vincent Siliye, 36, Vincent Sinasi, 53, Alex Mushakwa, 52, Diamond Salufu, 53, Hoster Ntombo, 52, Boster Samwuele, 38, John Ntembwe, 39, Frederick Ntambilwa oshowo omunamimvo 46 Alex Liswani. Sho iihokolola ya tameke metiyali ongula, aalumentu 12 kehe gumwe okwa tindi okukutha ombinga taya ti yo kaye shi oshitopolwa shiihokolola mbyoka. Mokupopya pehala lyongundu ndjika, Vincent Siliye ota ti: “Tse katu shi oshitopolwa shepangulo – iihokolola mbika. Tse otwa thiminikwa ashike shaa li pahalo lyetu opo tu kuthe ombinga miihokolola mbika yekengelelo enene.” Sho Omupehatamaneki Omukuluntu Daniel Small i ithana ombangi yEpangelo noku li omunambelewa omukuluntu mopolisi moRundu Celestino Christian e ye a gandje uumbangi wu nasha nomathano ngoka a thaneka pomahala gayooloka moshitopolwa shaCaprivi muAguste 2002, aalumentu ayehe 12 oya thikama nokuthiga po ongulu yiihokolola. Kakele oya ka uvithwa ko lwanima ya galukile mongulu yompangu konima sho pamwe nongundu yepangulo ya tsu kumwe opo iihokolola yi undulilwe komeho sigo etitatu ku talike ngele otaya ka talulula etokolo lyawo ndyoka. Momasiku 15 Maalitsa nuumvo, aalumentu 12 natango oya thigile po ompangu konima sho ya tindilwa ya ninge eipopilo shi nasha nepangulo lyekengelelo enene oshowo iipotha yilwe tayi ya tamenekelwa. Pokati mpoka, iipotha mbyoka taya tamanekelwa kompangu nepangulo oya pitikwa yi ye komeho pwaa na aatamenekwa ngaashi tashi uthwa kOveta yaNamibia yi nasha niikulumuna. Ongundu ndjika yaafekelwa metiyali natango oya dhengwa ondhimbo onene, sho oohahende yawo mbali dhoka hadhi futwa kepangelo; Zagrys Grobler naNate Ndauendapo dhi ikutha mo moshipotha sha landula komauvoko gopambambo nokwaatsakumwe nkene epangulo tali vulu okuyiwa nalyo komeho. Eikuthomo moshipotha osha zi mpoka sho aanaveta yaali ya tindi egandjo ishewe lyomaindilo okushonga – okutamaneka epangelo lyaNamibia kutya kali na uuthemba okupangula aafekelwa mbaka moshinima shoka. Omaindilo ga faathana okwa li ga ekelwahi kOmpangu yOpombanda muKotoba omvula ya zi ko (2005). Aalumentu mboka 12 otaya pangulilwa efekelelo lyokukutha ombinga miiponokela ya ningilwe muAguste 1999 nelalakano okutenda ko Caprivi kuNamibia. Oya taalela ishewe iipotha yi nasha nekengelelo lya shiga ko, ekuyungutitho lyoshigwana, iilonga yuunamapowe, okukala niilwitho – oondjembo niikuti yadho shaa li paveta, iinima ayihe mbyoka ya tindile okupopya sha kuyo muMaalitsa nuumvo. Aalumentu ayehe mboka oya tulilwe miipandeko momumvo 2002 konima sho epangelo lyaBotswana lye ya gandja miikaha yepangelo lyaNamibia. Yamwe yomaafekelwa oya kwatelwe muDesemba 2003, konima sho Epangelo lyaBotswana lye ya shunitha koNamibia, konima sho uuthemba wawo wuuholameno wa hulithwa po kuBotswana. Etompelo ndyoka lya gandjwa shi nasha nehulithopo lyuuthemba wawo wokukala moBotswana otaku tiwa inayi iyutha komaukwatya noompango dhi nasha nokukala moBotswana, oshoka okwa li ya galukila ishewe koNamibia shaa li paveta omanga ya li ye na okukala ongoontauki moshilongo shoka. Aafekelwa otaku tiwa oya kala tayi iyunganeke moCaprivi oomvula dhontumba konima sho aaitendiko ya ponokele omahala gepangelo oshowo galwe moKatima Mulilo momasiku 2 Aguste 1999. Aalumentu 12 oya kala mokakuma mondholongo onene mOvenduka. Oshipotha sha faathana otashi tamanekelwa ishewe ongundu onkwawo ndjoka ya thikama po maafekelwa yevulithe 100, niihokolola yawo ohayi ningilwa ngashingeyi mosaala yondholongo onene yaVenduka konima sho ya tembuthwa okuza kOshaanda momumvo 2005.