WINDHOEK – Aalumentu 12 okuza moshitopolwa shaCaprivi mboka taya tamanekelwa ekuthombinga lyeumboko lyEpangelo lyaNamibia momumvo 1999 nelalakano okutula koshipundi epangelo li ithikamena po moshitopolwa shika, ngashingeyi oye li aanadholongo konima sho metiyali ya pewa kehe gumwe egeelo lyepiyaganeko lyompangu. Aalumentu mboka 12 metiyali ongula oya pewa egeelo kOmupanguli gomOmpangu yopOmbanda John Manyarara, okukala mokakuma omasiku 30 sho ya piyaganeke iihokolola yompangu nomaimbilo nokwiigidha omanga ompangu yi li metifa. Kakele kegeelo lyuule womwedhi mondholongo, aafekelwa mbaka oya kanitha wo omauwanawa galwe ya kala haya mono ngaashi aatalelipo oshowo iinima yimwe yopaumwene hayi pewa aafekelwa mboka ya tegelela epangulo omolweihumbato lyawo lyuutangalali nokwaasimaneka Ompangu yOpombanda. Oshiningwanima shoka sha etitha egeelo ndika osha ningilwe metiyali omanga Omupolisi gwedhina Celestino ina gandja uumbangi we wu nasha nomathano ngoka a thaneka pomahala mpoka pwa ningilwa iiponokela moCaprivi. Konima ashike Celestino sho a ningi egano lye opo a tsikile negandjo lyuumbangi oshikando oshitiyali, aalumentu ayehe 12 oya thikama oshita nokutameka taya imbi nokwiigidha taya ti: “Viva Caprivi. Viva Muyongo. Viva Mamili.” Oya kala taya imbi nokwiigidha ngawo konyala uule wominute mbali sigo ndatu lwaampoka, nokonima OmutamanekiNdjayi Daniel Small okwa longitha oveta okugeela aafekelwa 12 omolwepiyaganeko lyiihokolola mompangu. Konima sho ya pewa egeelo ndika, aafekelwa natango oya thikama ishewe oshikando oshitiyali nokutameka taya imbi eimbilo lyekondjelomanguluko melaka lyawo. Shika osha etitha Omupanguli Manyarara a lombwele opolisi yi ya kuthe mo mongulu yepangulilo. Iihokolola yawo yepangulo li nasha nekengelelo enene oshikando oshitiyali oyi na okuningwa pwaa na eholoko lyawo. Pokati mpoka, sho aalumentu mbaka taya zi mongulu yompangulilo, oya tsikile nokwiimba nokwiigidha: “Viva Caprivi. Viva Muyongo. Down Namibia.” Oomwedhi dha zi ko, iihokolola yompangu oya manitha egandjo lyuumbangi koohatoyi dhEpangelo pwaa na eshongo lyasha konima sho oohahende yaali ya futwa kepangelo – Zagrys Grobler naNate Ndauendapo yi ikutha moshipotha. Ongundu yaafekelwa natango petameko lyiihokolola okwa li ya tinda okupopya sha komatamaneko taya ningilwa. Kakele, Epangelo olya tsikile nomatamaneko pwaa na omaipopilo gawo. Shika osha ningwa paveta ndjoka tayi ti ngele omufekelwa nenge aafekelwa oya tindi okwiipopila, otaya vulu okutamanekwa pwaa na eipopilo lyawo. Aalumentu mbaka 12 oyo: Progress Munuma omunamimvo 40; Manepelo Makendano 41, Shine Samulandela 36; Vincent Siluye 36; Vincent Sinai 44; Alex Mushakwa 52; Diamond Salufu 53; Hoster Ntombo 41; Boster Samuel 38; John Ntembwe 39; Frederick Ntambilwa naAlex Liswani 46. Ongundu ndjika otayi tamanekelwa ekuthombinga miiponokela mbyoka ya faalela oomwenyo dhaantu muAguste 1999 nelalakano okutenda ko Caprivi kuNamibia. Iipotha yimwe oya kwatela mo onkambadhala yokuumba koshipundi epangelo, ekuyungutitho lyoshigwana, okukala noondjembo niilwitho shaa li paveta. Aafekelwa ayehe mbaka okwa li ya kwatwa momumvo 2002 konima sho Epangelo lyaBotswana lye ya gandja miikaha yepangelo lyaNamibia. Yamwe yomaafekelwa oya tulilwe miipandeko muDesemba 2003, konima sho epangelo lyaBotswana lye ya gandja kuNamibia, sho ya kanitha uukwatya wawo wuuholameno mboka kwa li ya pewa moBotswana. Etompelo oku ya kutha uuthemba wuuholameno otaku tiwa omolwashoka oya taaguluka omauthoveta gawo okukala moBotswana, sho pompito yimwe kwa li ya galukila ishewe moNamibia shaa li paveta omanga kwa li ya talika ko kutya oontauki moBotswana. Aafekelwa otaku tiwa oya kala tayi iyunganeke moshitopolwa shaCaprivi uule woomvula dhontumba omanga inaya tameka okuponokela omahala gepangelo oshowo galwe moKatima Mulilo momasiku 2 Aguste 1999. Aalumentu 12 otaya kala mokakuma mondholongo onene yaVenduka. Pethimbo ndika inaya kalelwa po paveta konima sho Oshikondo shUuyuuki shi nasha nOmakwatho gOpaveta sha ekelehi omaindilo gawo ngoka taga pula kutya otaya ka taamba ko ashike aanaveta mboka ye na ehalo okuningulula omaindilo gawo ngoka taga ti Namibia ke na uuthemba oku ya pangula moshipotha shika. Omaindilo gawo ngaka ga faathana okwa li wo ga ekelwahi kOmpangu yOpombanda omathimbo ga zi ko.