Opolisi oya ti oya lopotelwa ookalyamupombo taya dhengele aantu mboka ye li momusholondondo gwaantu taya ka kutwa mopolisi kutya otaya vulu okuyambidhidhwa mbala, ngele ya futu oshimaliwa shontumba.
Omugandji gwomauyelele gopolisi moshilongo Deputy Commissioner Kauna Shikwambi okwa ti oya lopotelwa kutya ope na oonomola tadhi dhengele mboka ya pita mo kutya otaya dhenge okuza koombelewa oonene dhopolisi koWindhoek taya gandja omayakulo gaamboka taya ndopa okugwanitha po ayihe tayi ka pulwa.
“Anuwa otaya lombwele aantu kutya otaye ya pititha nomikalo omiwanawa, opo kaaya ende nomilandu adhihe dha tulwa po, oshoka oyo ye li moombelewa dhopombanda, shampa ashike taya futu oshimaliwa okuza N$800,” ta ti ngaaka.
Shikwambi ta kumagidha oshigwana kaashi pulakene oohapu dha tya ngaaka, opolisi itayi dhengele aantu, naamboka taye shi ningi, otaya longitha edhina lyopolisi iifundja.
Ta gwedha po kutya opolisi ihayi pula oshigwana iimaliwa opo gumwe a kutwe.
“Otatu indile mboka ya piti mo oshowo aakuluntu yawo ya kale ya kotokela oongodhi ndhoka tadhi dhenge shi na sha nekuto lyetanga lyegameno,” ta ti ngaaka.
Ta gwedha po kutya opolisi oyi na omilandu dhayo dhopambelewa, nuuna ya hala okutseyithila oshigwana kombinga yaashoka shi na okuningwa, nena ihashi ningilwa konima yomakuma.
Shikwambi okwa ti, oshigwana nashi kotokele oonomola 081 436 4903 oshowo 081 436 4929.
Oonomola odho tuu ndhoka odha kala tadhi taambathanwa komalungulu, tadhi tula oshigwana mokatoo.