Victoria Kaapanda
Aakalimo pamwe nopolisi moshitopolwa shaShikoto oya taalela omaupyakandhi giimbuluma, mbyoka tayi ende tayi indjipala, noya pimbila ethimbo ndika lyomatango omanene.
Omukuluntu gopolisi moshitopolwa shaShikoto Teopolina Kalompo Nashikaku okwa ti iimbuluma oya indjipala, aafuthi otaya longitha ompito kehe okuyuga aakwashigwana iimaliwa yawo, iihauto oshowo okuteya omagumbo. Moshiningwanima shimwe sha holoka mehuulilo shiwike, aalumentu yeli yatatu yomimvo 60, 43 oshowo 33 oyali ya ehamekwa sho kwali ya ponokelwa kaafuthi yali ya kankameke ohauto kwali taya hingi.
Oshiningwanima shoka anuwa osha holoka momukunda Onambeke momundhingoloko Onyaanya lwokomatango. Otaku hokololwa kutya oonakuninga iihakanwa mboka okwali taya hingi okuza kOndangwa nohauto yoD4D, no mondjila moka okwali ya pitike okahako kosuuka pegumbo limwe lyili pooha ndho pate, opo ya tsikile ondjila.
Nashikaku okwa hokolola kutya, ohauoto ndyoka okwali ya kankamekwa kaalumentu yeli yane mboka yali yazi mohauto yoDankie Botswana osiliveli yahomata oondjembo oshowo iilwitho yilwe.
Ta ti, sho taya pilikisha mpoka, omuhingi go D4D okwali ayahwa mepepe omanga ya kwawo yaali yali ya ehamekwa. Aafuthi mboka okwali ya pondola ashike okuya ontuku nongodhi yimwe yopeke nonando elalakano lyawo natango kali shi wike kutya okwali lyashike.
Aafuthi mboka okwali ya hingi yuuka kombinga yokOndangwa, ihe kayeshiwike. Ta ti, onkambandhala okuya konga oya ningwa ihe opolisi oya huulile muunyengwi. Opolisi moshitopolwa shaShana nayo otayi indile oshigwana shi longele kumwe nopolisi okulwitha iimbuluma pethimbo ndika. Opolisi moshitopolwa shaShana natango oya kumagidha oshigwana kaashi humbate iimaliwa oyindji komalutu.
Oshiwike sha ziko aafuthi okwali ya ponokele omunangeshefa mOshakati nokumuyuga iimaliwa yongeshefa yathika N$200 000. “Onda kala noku kumagidha oshigwana shi hulithe po okunana iimaliwa koomuma. Uuna gumwe a hala okulanda na kambadhale okulongitha uumbomba pamukalo gwoshinanena,” omupopiliko gopolisi moshitopolwa shaShana Thomas Aiyambo ta kumagidha ngaaka.
Ta ti, okwa li wo a kumagidha oshigwana shi kale tashi ningi omaindilo kopolisi, opo yi kale tayi thindikile oshigwana uuna taya ka nana iimaliwa oyindji. Aiyambo ta ti, ndika olyo ethimbo ookalyamupombo taya longo ya itula mo onkene oshigwana inashi pumbwa okukala sha kotha tashi mbonyoka.
“Onda kala noku popya iiningwanima tayi longwa kaafuthi miikundaneki ya yooloka oshowo okukumagidha oshigwana nkene shi na okwiihumbata, ihe natango otatu lopotelwa iiningwanima yoludhi ndoka,” Aiyambo ta ti ngaaka.