Paulina Ndalikokule
ONGWEDIVA – Aagandji yiilonga kaantu haya longo momagumbo, koohambo nomiikunino oya nyenyeta oondjambi oompe dha tulwa po kepangelo kutya odhi li pombanda unene, notashi vulika oyendji kaaya ka vule okukuta aantu momagumbo gawo ngele shoka tashi kondjitwa kepangelo osha tulwa miilonga.
Omukuluntuwiliki muuministeli waaniilonga nomagandjo giilonga Lydia Indombo metseyitho lyopambelewa mOOoondaha okwa ti kutya okambinete oka tambula ko etokolo lyawo opo oondjambi dhaaniilonga yokutonatela omaliko, yomuunamapya, omomatungo oshowo mboka haya longo momagumbo yi kale okuza po N$18 kehe mowili, okutameka muJanuali 2025.
Etokolo ndyoka olya landula ehiyo kwa li lya ningwa kuMinisita Utoni Nujoma momumvo 2024, kokakomisi hoka a li a pe oshinakugwanithwa shokukonaakona oondjambi dhaaniilonga mboka noku ka gandja omayele gi ikolelela kwaashoka ya mono po.
Indombo ta ti aagandji yiilonga ayehe oya tegelelwa oku ki iyutha ketokolo ndyoka naamboka haya futu sh ivule po N$18 mowili kehe itaya ka pitikwa okufuta koN$18, oshoka ondando ndjoka oyo yi na okukala etameko.
‘Ngele shayi miilonga otashi kwathele aantu mboka haya mono oondjambi dhi li pevi ya mone ooondjambi dhi li hwepo, tukuthe po okwaathike pamwe moondjambi, oluhepo tse tu hume komeho aantu,’ Indombo a ti.
Aaniilonga yomomagumbo haya futwa N$9.02 kowili ngashiingeyi okwa tokolwa ya kale taya gwedhelwa uule woomvula ndatu, okutameke poN$12.02 kowili omvula yotango, N$15.02 omvula ontiyali noN$18 momvula ontintatu. Aaniilonga yomuunamapya mwa kwatelwa yokoohambo noyomiikunino mboka ngashingeyi haya futwa okuza poN$6, otaya ka futwa N$10 kowili, omvula yotango, N$15.02 momvula ontiya noN$18 momvula ontintatu.
Akwilinus Immanuel omunashilonga gwepangelo ngoka e na aanilonga yaali yomegumbo, gumwe kohambo nagumwe koshikunino okwa indile uuminisiteli tale nawa etokolo ndjoka, uunene tuu kaaniilonga mboka haya pewa omalukalwa niikulya.
“Tse yamwe aaniilonga yetu ihaya futu omeya, iikulya nenge omalukalwa oshoka ohatu ya pe oshali, opo katu kanithe aaniilonga tse tu vule okwiiyutha ketokolo ndyoka, napa kale euvathano kutya mboka haya li nokulala oshali naya kale kofuto onkulu, a ti ngaaka.
Aagandji yiilonga oyendji otaya nyenye ta kutya oondjambi ndhoka haya futu aaniilonga ohadhi zi owala poondjambi dhawo meukililo.
“Ngele ou na omuniilonga megumbo nokohambo, oho ya futu owala pondjambi yoye oshoka egumbo kali shi ongeshefa, nohambo ihayi zi oshimaliwa utye omo to kutha oondjambi dhaaniilonga ohatu topolwa owala oondjambi ndhoka hatu pewa kepangelo naaniilonga yetu. Oondjambi ndhoka ashika nadhi tulilwe po oongeshefa ndhi dha kola,” omugandji gwiilonga gumwe ta ti.
Mukwawo ta gwedha ppo ta ti, “Omuntu nando oto longo mepangelo itashi ti kutya ondjambi yoye oyindji, tse yamwe ohatu futwa oondjambi dhopevi. OoN$3 000 ndhoka tadhi popiwa otatu dhi kutha peni ngele ihatu thigala po nandho? Shila natu thige po iilonga tuye tuka kalele omagumbo oshoka – omuntu iilonga oweyi pumbwa nande okandjambi okashona -ngoye owa pumbwa ngaa okukwatela po egumbo lyoye,” omuniilongwa gwepengelo ngumwe ta ti.
Omunangeshefa omushona ngoka ina ahala edhina lye lyi popiwe okwa ti okwa toto ongeshefa i ikwathe ye a gandje woo iilonga koohandimwe, ta ti omulandu ngoka gwa tulwa po otagu mu thiminike a ka tidhe aaniilonga yamwe ye a vule okufuta mboka ta kala po nayo.
Omuniilonga gomegumbo Dortea Hishidimwa okwa ti nonando etokolo ndyoka ewanawa, aantu aashona taya ka mona uuwanawa mboka oshoka aagandji yiilonga oyendji itaya ka iyutha kulyo.
“Maantu oyendji nda longela kape na nando ogumwe ha iyutha ketokolo lyokufuta oondjambi ndhoka ya tulilwa po, yo onshona nale, ohatu lombwelwa ashike kutya ngele ito vulu otapa kongwa owala gumwe ngoka ta vulu, molwaompumbwe ohatu itayele ashike okufutwa nando N$500,’ a ti.
Hishidimbwa okwa longa oomvula dha thika po10 momagumbo gomeendolopa, momikunda nokukala naanona.