Ominista yomauyelele, omakwatathano nuutekinologi Dr Peya Mushelanga okwa kumike aanambelewa yomakwatathano naagandji yomauyelele yepangelo ya kambadhale opo ya kale ye na omakwatathano omawanawa noshigwana, itaapa talika ooondondo dhomithika dhawo ngaashi pashimaliwa nenge mpoka ye li.
Shi ikwatelela kuMushelenga, ekwatathano lyepangelo naakwashigwana otali tulwa ashike kondjele uuna oshigwana shi na uuyelele awuhe sha pumbwa, noshi uvite ko omauyelele ngoka.
Minista okwa li ta popi pepatululo lyoshigongiilonga shomasiku ge li gatano shi na sha netulomiilonga lyomikalo dhokuninga omakwatathano pokati kepangelo noshigwana, shoka sha tameke mOmaandaha moSwakopmund. Omakwatathano gepangelo oge na uuwanawa wa yooloka, mwa kwatelwa elongo, eyambulepo lyonkalo, okwiinikathana komilungu nokuninga omatokolo, onkene oombelewa dhepangelo nadhi pe aakwashigwana uuyelele opo ku ningwe omatokolo gomondjila,” ta ti ngaaka.
Ta gwedha po wo kutya omakwatathano gu uka noga yela oshi li shimwe shomoongudhi dhuundemokoli noshi li oshimpangwa moka epangelo hali longo nawa naakwashigwana, tali ya longo noku ya tseyithila kombinga dhoopologalama dhepangelo nokutaamba omagwedhelepo nkene lyi na okulonga naakwashigwana. “Onatu kutheni ethimbo opo tu tale kutya otwa kutha ko oshimpungu shi thike peni okuza oshikando shahugunina twa li twa kuutumbeni.
Aakwashigwana oye na uuthemba okutseya shoka tashi longwa kepangelo.
Onkene oshinakugwanithwa shetweni ok gandja uuyelele womondjila, tawu gandjwa kuyele na kape na okuholeka,” Mushelenga ta ti ngaaka.
Elalakano lyoshigongiilonga shika okushilipaleka kutya aagandji yuuyelele wepangelo otaya endele pamwe nethimbo osho wo ondungethaneko yepangelo yokugandja uuyelele moshigwana. -Nampa