Elelo lyondoolopa yaMuthiya olya gandja iilonga kaagundjuka ye li 221, okuza muJuli nuumvo.
Omupopiliko gwondoolopa Ottilie Shingenge, okwa lombwele oshikundaneki shoNampa kutya iilonga mbika otayi gandjwa nelalakano okunkondopeka paiyemo aakalimo yomondoolopa naamboka yopomikunda dhopopepi.
Ongundu yotango yaagundjuka ya li ya kutwa momasiku 11 Juli oya li ya thikama po maantu 78 nontiyali ndjoka ya tameke iilonga momasiku 26 oya li ya thikama po maagundjuka 70. Ongundu ontintatu yaantu 73, yo oya kutilwe momasiku ga8 Aguste.
“Elelo lyondoolopa olye ya po nomusholondondo gwaantu mboka kaaye na iilonga, naantu mboka ohaya pewa iilonga sha ikolelela kwaangoka e ya po nenge a ishangitha tango, oshowo komilandu nokuutendo wondoolopa mboka hawu longithwa okukuta aantu miilonga,” Shingenge ta ti.
Elelo otali ka tsikila okugandja iilonga yopakathimbo oshiwike kehe muule woomwedhi mbali ngele pu na ompumbwe yoku shi ninga. Elalakano okugandja oompito shi li pauyuuki kukehe ngoka a inyolitha. Shingenge ta ti iilonga mbyoka hayi gandjwa oyokuteta iihwa, okutoola iiyagaya, nayilwe mondoolopa. –Nampa