Onooli yaNamibia oyi na uuyamba woohambo noompito odhindji dhiilonga yomomagumbo mbyoka tayi vulu okuhupitha aagundjuka oyendji. Ndhika odha popiwa kuhamushanga gwewawa lyaakulupe moSwapo Kanana Hishoono.

Hishoono ndhika okwe dhi popya pethimbo lyoshipopiwa shokomumvo shaGavena gwaHangwena Walde Ndevashiya mEtiyali.

Okwa totha mo iitopolwa mbyo e uvite kutya oyi na iilonga yaanyasha oyindji ya kwatela mo Kunene, Omusati, Oshana, Ohangwena, Oshikoto, Kavango East, Kavango West noZambezi.

“Iitopolwa mbika oyi na lela iilonga, aagundjuka yetu onkene taya tsikule nokulila taya kongo iilonga, anuwa oya hala okulonga mepangelo, inaya hala iilonga yomomagumbo,” Hishoono ta fatulula.

Ta ti mboka ya kutwa onga aaniilonga yomomagumbo gAanamibia aagundjuka taya zi poshishiindalongo Angola, omanga mboka yomoshilongo haya ka konga iilonga kuumbugantu woshilongo hoka haya ka kala owala oothika pomatopokelo goondjila taya hehela iilonga.

“Ngele hasho taya ningi shoka, ohaya ka longa iilonga iiwinayi noyuulingilingi muushimba, shi vulithe okukala muka taya ilongele yoyene yo taya yambidhidha aakwanezimo lyawo,” Hishoono ta ti. 

Moshipopiwa she, Ndevashiya okwa ti eetepo lyiilonga yaagundjuka otali kala oshitsa shopokati momalalakano gombelewa ye gehumokomeho lyoshitopolwa.  

Ta ti ombelewa ye oya gandja iilonga yokutunga uundjugo wu li 384 koongeshefa dhaagundjuka moshitopolwa. Uundjugo mbuka wopashinanena, wiilambo, ano ihaawu pombwa tawu lalakanene ehumithokomeho lyuuyogoki kiitopolwa yokuushayi owu na ongushu yomiliona N$4.3. 

Ngolongeya Ndevashiya ta holola kutya aaneithano miilonga yuundjulowele ye li 94, mboka opo ya mana oosikola noya kala kaaye na iilonga oya kutwa noya pewa ookontalaka dhoomwedhi ndatu ya longe nuuministeli wuuhaku mekondjitho lyombuto yoCovid-19. 

–Nampa