Paulina Ndalikokule
Ngoloneya gwoshitopolwa shaHangwena Sebastian Ndeitunga okwa ti aagundjuka oyendji inaya thika natango komahala gokushangelwa uukalata womahogololo.
Ndeitunga ngoka i ishangithile kOmhedi pamwe nOhamba yOukwanyama Martha Mwadinomho yaKristian Nelumbu mOmaandaha okwa ti aagundjuka moshitopolwa otaya hakele poondingosho shoka tashi ya imbi oku thika komashango.
Onkene okwa pula aalandithi yomalovu opo ya kale taya pata uundingosho nomahala galwe gomanwino mOmalyomakaya yo ya gandje ompito kaanyasha ya ka ishingithe.
“Aanyasha oyendji inaya holoka ohela sho nda talatala moshitopolwa, yo oyo taya vulu oku eta elunduluko oshoka oyendji, ota ndi indile ngeyi ya ka ishangithe opo ya vule oku ka hogolola,” Ndetunga a ti.
Omunambelewa omukuluntu gwomahogololo moshitopolwa shaMusati Elizabeth Shiningayamwe okwa ti omashango guukalata womahogololo ngoka ge li metifa otaga ende nawa, naanyasha oyendji oyo taya holoka.
Omaishangitho guukalata womahogololo moshilongo oga tameka mOmaandaha, notaga yi sigo omo 1Aguste 2024. Shika otashi ningwa meilongekidhilo lyomahogololo ngoka taga ka kala ko momasiku 27 Novomba nuumvo.
“Onda fuuka okumona aanyasha oyendji taya ishangitha, oshoka oyendji ohaya tegelele olundji esiku lyahugunina, oya kala nokuli momikweyo ethimbo ashike inaya nyenyeta. Shika otashi ulike eitulemo lyawo mokukutha ombinga momahogololo,” a ti ngaaka.
Shiningayamwe okwa lombwele Kundana kutya moshitopolwahogololo shaMusati omu na omamahala 56 gokwiishangitha nopehala kehe ope na aanambelewa yomashango yane nomunambelewa omukuluntu gumwe.
Ta ti, oya li nuupyakadhi ohela womashina gokuthaneka taga ende kashona molwonkalo yombepo ndjoka ya talala. “Otandi indile ngeyi oshigwana shi idhidhimikile okukala momikweyo, sho shi ishangithe manga kuyele,” Shiningayamwe ta ti. Okwa ti otaya ka kambadhala okutula po aagandji yuuhaku womeendelelo pomahala ngoka opo ya vule okukwathela ngele ompumbwe ndjoka ye ya.
“Mongashingeyi out na po aapolisi mboka taya vulu okukwathela ngele omuntu a gombokele momukweyo ashike komeho otatu ka kambadhala tu tule po aagandji yuuhaku wopetameko, a popi ndhoka.
Ngoloneya gwaMusati Erginus Endjala ngoka a ishangitha nale mOmaandaha, okwa ti ope na aantu taya taandeleke omauyelele gapuka kombinga yokwiishingithila miitopolwa ya yooloka naampoka haya kala.
“Otaku ishangithwa omahogololo gopaupresidente, nomuntu kehe ota vulu okwi ishangithila kehe mpoka wu li,” a ti ngaaka.
Kansela gwaMpundja Adolf Uunona okwa ti aantu mboka itaya vulu okuthika pomahala gwokwiishangitha naya tseyithile ombelewa ye opo ya vule okuninga omalongekidho ga gwedhwa po. Ookansela oyendji nayo oya ishangitha nale, taya kunkulile aakwashigwana ya ishangithe. –ndalikokulep@gmail.com