OTAVI – Aagundjuka ye li 32 mOtavi oya li ya pewa oonzapo mEtiyali konima sho ya li ya mana omadheulo gawo ge na sha nuunangeshefa osho wo eyambulepo lyuunongo wawo. Omadheulo ngaka oga li ga etwa po kombelewa yakansela yoshikandjohogololo shoka pamwe nomutotipo gwehangano lyoStrategic Management and Consulting Services, Isaac !Hoaeb ngoka omo naye ha zi mondoolopa omo tuu moka. Aanyasha mbaka 32 mEtiyali oya li ya pewa oonzapo konima yomadheulo ngaka omafupi ngoka ga kwatela mo uunongo ngaashi omakwatahano pokati kaantu, eyakulo ewananwa lyookastoma, uuwiliki, uunangeshefa osho wo ewiliko lyoongeshefa.
!Hoaeb ta ti ookampani dhimwe odho dha li dha kwashilipaleke omadheulo ngaka, ta ti ongundu natango yaantu yalwe ye li 50 oya tegelelwa wo ya ka dheulwe muJuni. Oto Ipinge, ngoloneya gwoshitopolwa shOtjozondjupa okwa li a gandja oonzapo ndhika kaalongwa nokwa li a uvaneke oshimaliwa shi thike pooN$50 000 okuza kombelewa ye onga oshimaliwa shokukwatha mboka ya hala okutameka oongeshefa dhawo.
Ipinge okwa li a pula patrona gwoopolohalama dhomadhulo ngaka, Omukuluntuwiliki gwelelo lyondoolopa Otavi Moses Matyayi opo a tothe mo aalongwa mboka ye na ehalo lyokuninga oongeshefa noku ya kwathela ya tule poombapila oontengenekwathaneko dhoongeshefa ndhoka tadhi ka wilika oongeshefa dhawo. Ipinge ta kumike aagundjuka ya kale neyitulemo, ya tote oompito dhiilonga noya hulithe po okutala kepangelo lyi ya pe iilonga.
“Oto kala wu li nawa ngele wa tameke ongeshefa yoye ndjoka tayi ke ku pa oshimaliwa kehe esiku shi vulithe to ka konga iilonga kepangelo moka u na okutegelela ondjambi yoye komusilo gomwedhi,” Ipinge ta ti.
Aagundjuka oya ulika kutya oya hala okutota oongeshefa dhawo. Irene Ubugais okwa ti okuza mo2018 okwa kala nokuhupa mokulanditha omagadhi gokwiitsinina ngoka haga nika nawa.
Destiny Hoaes ta ti omadheulo oge mu patulula a tameke ongeshefa ye ndjoka hayi mu etele iiyemo. “Omadheulo oga pa ndje omadhiiladhilo omape. Onda hala okutula po okapoloyeka kandje okashona .” ta ti ngaaka. Mayola gwaTavi Martha Shipanga okwa ti okwa hala okumona aanyasha ayehe mboka yaa na iilonga nokwa pula ookampani dhopaumwene dhi yambidhidhe opolohalama ndjika.
(NAMPA)