Kakukutu komatanga gopolisi moshilongo Joseph Shikongo okwa kumagidha aahingi yiiyenditho opo ya hinge nuukeka nokugwanitha po oompango nomandhindhiliko sho aanasikola taya shuna koosikola. “Aahingi naya kale taya landula omandhindhiliko agehe ga tulwa moondjila okuyanda iiponga oshoka oondjila otadhi kala dhu udha, unene okuza oshiwike tashi ya,” ta kumagidha ngaaka.

Okwa ti, ohashi kala oshihwepo ngele aatelelipo taya shuna kuyele komahala gawo hoka haya kala opo oondjila kaadhi kale dhu udha. Shikongo okwa kumagidha wo yaa hingilile yo yaa hinge ya vulwa nenge ye li kohi yiikolitha. 

“Otwa hala ethimbo ndyoka lyi kale lyaa na iiponga yasha, nomolwa tatu kumagidha aahingi ya simaneke omandhindhiliko osho wo ya hinge nuukeka,” ta popi ngaaka. 

Omukuluntu gwopolisi moshitopolwa shaShana Nafal Lungameni Sakaria naye okwa londodha wo aahingi kaaya hingilile, yo kaaya hinge ye li kohi yomaluvu nenge ya vulwa. “Oyendji oya kanithileoomwenyo dhawo miiponga yomoondjila, ihe olundji ohashi holoka kokwaa landula omandhindhiliko gomoondjila osho wo okuhinga kwaantu ye li kohi yiikolitha,” Sakaria ta ti ngaaka.

Ta ti, okuhingilila itaku ti okuthika.

“Ngele oshigwana osha landula oompango adhihe dha tulwa po, nena kape na nando uuwinayi washa tau holoka,’’ ta ti ngaaka.

-vkaaanda@nepc.com.na