Ehangano lyina sha niiponga yomoondjila Motor Vehicle Accident Fund (MVA) olya londondha aalongithi yoondjila ya hinge nuukeka okuyanda ekanitho lyoomwenyo oshowo iiponga yoomondjila.
Omukuluntuwiliki mehangano lyoMVA Fund Rosalia Martins -Hausiku okwa kumagidha ngaaka konima ya kundana oshiponga shoka sha holoka okupendukila Etiyali, sho oombesa mbali dhiipumu mumwe, e ta dhi faalele oomwenyo dhaantu yaali.
“Aakiintu yaali oya hulitha poshikando sho ombesa yoInter-Cape ndyoka yali ya humbata aantu 57 yi idhenge mumwe nokabesa kokaIveco omutse nomutse,” ta hokolola ngaaka.
Ta ti, oshiningwanima osha holoka koongulasha dhEtiyali, lwopotundi 01h30, ookilometa 57 okuya kOtjiwarongo okuza kOtavi.
Martins-Hausiku okwa ti, oshiponga osha holoka sho ombesa yoIveco ndjoka yali tayi zi koWalvisbay ya kambandhala oku pitilila ohauto yimwe yali komeho, etayi dhenge moInter-Cape ndyoka yali tayi zi kOshakati.
Omuhigi gwoInter-Cape ngoka a mono oshiponga komagulu agehe okwali a falwa nokandhakandhaka koshipangelo shopaumwene kOndangwa a ka mone uuhaku womeendelelo, omanga aafaalelwa ya hetatu ya mono iiponga iihwepo taya mono uuhaku koshipangelo mOtjiwarongo.
“Mboka uuyelele twa mono sigo ethimbo twa pititha omushangwa nguka ashike opena ompito onkundana yi lunduluke omolwa uunene woshiponga,” ta fatulula ngaaka.
Martins-Hausiku okwagwedha po kutya iiponga yomoondjila ohayi holoka no hayi faalele oomwenyo dhoyendji, ihe shoka ohashi holoka uuna aahingi yiihauto itaaya landula nokugwanitha po oompango dhomoondjila.
Okwa ti, uuna oshiponga sha holoka kehe mpoka moshilongo, oshigwana nashi dhenge konomola yomeendelelo yo shali, 9682 opo ku hupithwe oomwenyo dhaantu.
Ondjayi yetanga lyopolisi Joseph Shikongo sho a talelepo iitopolwa yokonooli iiwike ya zi ko okwali wo akumagidha aahingi yiiyenditho kaaya hingilile, yo ya gwanithe po oomandhindhiliko gomoondjila.
“oshigwana nashi longithe nawa omandhindhiliko gomoondjila okuyanda iiponga yi holoke,” ta kumagidha ngaaka.
Shikongo okwa ti, opolisi yaNamibia oshilongo ashihe oya ilongekindha okukaleka po oompango onkene itaya ka pitika nando omuntu taka konda nenge taka yonagula oompango adhihe dha tulwa po.
Caption: Iiponga… Iiponga yomoondjila onkene tayi faalele oomwenyo dhaantu
Efano: ota li ulike ashike