Elelondoolopa lyaKeetmanshoop olya pula aakwashigwana mboka ye na uuketha wolusheno waa li paveta ya ishangithe noshikondo shamuni shedhina Keetmanshoop Electricity Business Unit (KEBU) sho ku na oshikonga shokwoopaleka omapuko nokudhimina po aakayulinyanga mbaka. Oshikonga shika osha tamekele momasiku 5 Febuluali notashi ka hula momasiku 31 Mai 2021. Moonkudathana noshikundaneki shoNampa, omupopiliko gwaMuni Dawn Kruger okwa ti ookastoma ndhoka dhi wete uuketha wawo wa fa wa yonagulwa nenge ihaaya futu iifuta nay aka ishangithe moshikonga shika.
Okwa ti oshikonga otashi lalakanene okulonga nokugandja uuyelele mokati kaakalimo ngele tashi ya kuuwinayi wokuyonagula uuketha wolusheno; okugongela oshimaliwa sha gwana okuziilila momukalo gwokulesha uuketha mondjila osho wo okushunitha pevi eyonagulo lyuuketha nuuketha inaawu shangithwa.
Kruger ta ti ngashiingeyi otaku tengenekwa kutya open a ekano lyiiyemo lya thika poopelesenda 10 shi na sha nomalusheno gaa li paveta nuuketha inaawu yalulwa, ta ti muni oku na wo uumbanda sho uuketha tawu yonagulwa.
“Itatu vulu okumona oongunga dhetu, olundji ookastoma itadhi vulu okufuta oondjo ongoshizemo shuuketha wa dhanenwa naashika otashi ka eta elelo lyi gandje omayakulo ga nkundipala,” Kruger ta popi ngaaka. Elelondoolopa lyaKeetmanshoop ohali longitha konyala oomiliona N$5 molusheno omwedhi kehe.
Okudhanena olusheno ekayulonyanga lyoveta naangoka ta adhika ta longo iilonga mbyoka yomuyonena ota futithwa N$6 000, omanga omukayulinyanga oshikando oshitiyali ta futithwa N$12 000 nomutitatu N$16 000.
Kruger ta ti ookastoma ngele odha ishangitha moshikonga shika shedhiminopo nena iifuta ayihe otayi ka ekelwahi. Mboka taya ka ndopa okwiishangitha ndele KEBU ta ka adha po omalusheno gaa li pamulandu, nena otaya ka futithwa.
“Kape na omapulo tag aka pulwa onkene ookastoma otadhi ka pulwa dhi ishangithe pethimbo ndika, sho okastoma tayi ishangitha otayi ka pulwa yi fute N$229.00,” ta ti ngaaka.
-Nampa