OUTJO – Aakalimo yomondoolopa yOutjo moshitopolwa shaKunene oya li ya ulike okwaa uva nawa kwawo mEtitatu kombinga yetokolo lyompangu yopomanda ndyoka lya li lya pitithwa muMaalitsa nuumvo opo omukiintu gwoomvula 63 a thige po ofaalama yopaumwene, omukiintu nguka omo a valelwa mofaalama moka, omo a putukila naakwanezimo ye omo ya fumvikwa moka.
Etokolo ndika olya li lya gandjwa momasiku 25 Maalitsa a thige po ehala, osho wo elanditho lyiimuna yaIrmgard Hoeses ngele okwa ndopa okukutha mo iinima nomaliko ge mofaalama ndjoka muule womasiku 30 okuza kesiku lyetokolo ndyoka lya gandjwa.
Hoeses, ta popi noNampa mEtitatu okwa ti kutya okwa li a tidhwa mo mofaalama pambelewa mEtiyali nokwa ti elanditho lyiimuna ye otali ka kala ko momasiku 7 Aguste 2020 koshigunda shedhina Outjo Agra Auctioneer.
Okwa ti kutya shika oshizemo sho a ndopa okukutha mo iimuna ye nokuthiga po ofaalama yedhina Farm Aimab No.124 ndjoka yi li ookilo 30 muuninginino wOutjo. Hoeses ota ti kutya ooyinakulu omo ya fumvikwa mofaalama moka, pamwe noyana yaamwayina yatatu mboka a putuka nayo pofaalama mpoka aavali ye ya kala haya longo.
“Ngashiingeyi ondi na okukanitha iikombo 34, oonzi 27 noongombe ne kelanditho lyiimuna. Onda pumbwa ekwatho ndi mone iimuna yandje,” ta ti ngaaka.
Omukalimo gomOutjo Margaret Pieters okwa li a ti kutya etokolo lyompangu kali li pawuyuuki, ta ti kutya ngashiingeyi nakutidhwa ke na mpoka ta vulu okuya oshoka mofaalama moka omo ashike mwa kala maandjwo okuza nale manga oshilongo inaashi manguluka. Ta ti kutya ofaalama ndjoka muSepetemba oya li ya landwa po kuPeya Hitula nomukulukadhi gwe Hilia Hitula
“Okuza sho ye yi landa ko, oya kala nokuninga omatilitho goku mu tidhaatidha. Shika ohoni onene kaaleli yetu yopapolitika mboka ya tala ko ashike ngokuuvu wombwa,” Pieters ta ti ngaaka.
David Hawiseb (52) ngoka wo naye omukalimo gwomOutjo, okwa ti kutya otashi ehama aantu oyendji okumona omukiintu kee na oonkondo dhasha ta tidhwa mofaalama pamukalo ngoka, niimuna ye tayi landithwa po.
“Iipotha ngambika oya pumbwa eyidhopemo lyepangelo oshoka omukiintu nguka okwa pumbwa lela ekwatho,” ta ti ngaaka.
Mwene gwofaalama ndjika Peya Hitula okwa li a lombwele oshikundaneki shoNampa mongodhi mEtiyali kutya Hoeses na thige po ofaalama ye.
“Onda kala noku mu pula a kuthe mo iimuna ye, ashike ine shi ninga. Kayi shi ofaalama yetulululo ndjika, oyandje yopaumwene,” ta ti ngaaka.
Kansela gwOutjo Johannes Antsino okwa ti kutya oshipotha shika oku shi shi.
-Nampa