Nonando elelo lyondoolopa lyaNgwediva tali tsikile okulongekidhila aakalimo yalyo oopolota, oyendji natango otaya tsikile okuninga omaindilo.
Kehe omukwashigwana okwa hala ehala lye mwene. Yamwe oya hala gokutunga omagumbo nenge okungila omangeshefelo.
Mongaashingeyi ngoka keena ehala lye mwene oha mono iihuna okufuta omahala gomalukalwa nenge gomangeshefelo.
Omugandji gwomauyelele melelo lyondoolopa yaNgwediva Jackson Muma okwa ti, aantu ye vule 5 500 oya ningi omaiyindilo goopolota mOngwediva.
“Aantu mboka ya ningi omaindilo oyeli monguundu dha yooloka, mboka haya mono oshimaliwa oshishona, mboka haya mono oshimaliwa shili hwepo oshowo mboka haya mono oshimaliwa oshindji,” ta ti ngaaka. Ta ti, mboka haya mono oshimaliwa oshi shona oyeli 2 940, naamboka haya mono oshimaliwa shili hwepo oyeli 715 omanga mboka haya mono oshimaliwa oshindji yeli 1 933.
“Nonando omwaalu gomayindilo ogu li pombanda oya ningi onkambadhala okugandja omahala mpoka pena, momindhingoloko dha yooloka ndha Ngwediva,” ta ti ngaaka.
Muma ta ti, oopolota dhili 209 kumwe odha gandjwa momindhingoloko ngaashi Okandjengedi, Onawa oshowo Mandume, omanga oopolota dhili 74 tadhi longekidhwa kEfidi.
“Oopoloto dhili 300 otadhi longekidhwa kOnawa, omanga Efidi Extension 6, tali longedhilwa ooplota 103,” ta ti ngaaka.
Ta gwedha po ta ti, oopolota dhili 100 kEfidi Extension 2 oshowo oopolota dhili 70 kEfidi extention 3, opo tadhi opalekwa nokulongekidhwa.
Muma ta ti, momayindilo agehe ya mono, aantu ye li 29 oya ningi omayindilo go mahala go malukalwa omanga yatano ya ningi omayindilo gomahala guunamapya. “Omayindilo gomahala guunamapya ogo omashona komayindilo agehe, shoka tashi ulike kutya oyendji kaye na ohokwe nuunafalama wuunamapya,” ta ti ngaaka. Ta ti, natango oya mono wo omayindilo gomahala gomangeshefelo ge li 168, 193 gokulongela ii etwapo oshowo geli 39 goosikola.
Shoka osha ulike nkene aakalimo yeli moompumbwe dhomahala, onkene elelo lyondoolopa yaNgwediva ota li tsikile okulonga sigo lya gwanitha po oompumbwe dhaakalimo ya wo.