OKAUKAMASHESHE- Aakulukadhi ya hokanwa unene komikunda dhokombuga anuwa otaya thigi po aasamane yawo taya kaanahambo yAangola.
Ndhoka odha popiwa komunambelewa koshikondo shokulwitha omahepeko muuministeli wegameno moshitopolwa shaShana Secilia Mbowe sho kwa li ta gandja omalongo nomapukululo kaakalimo yomoshitopolwa shaShana mehuliloshiwike.
Ta ti, aakulukadhi itaya simaneke we aasamane yawo yo itaye ya sile oshimpwiyu, otaye ya thigi momagumbo nomandjandja taga lili omanga taya yi kaanahambo, mboka oyendji yomuyo anuwa Aaangola.
“Aakulukadhi oya tembuka mo momagumbo ya ya poohambo dhopopepi, omanga ya thiga aasamane yawo momagumbo. Ngele omusamane oku na uunkundi ita vulu okunyanyudha omukulukandhi gwe, na thike koshipangelo a mone uuhaku, ota yakulwa,” ta kumagidha ngaaka. Mbowe ta ti iiningwanima tayi ningwa koshitopolwa shoka iiwinayi notayi sitha ohoni.
Ta gwedha po ta ti, aasamane natango anuwa itaya silwa oshimpwiyu, otaya zala omizalo dha gagala noonkondo mokati kaantu, oya sa ondjala itaya telekelwa yo natango otaya tukwa kaakulukadhi yawo.
“Esimaneko kali po we. Otandi popi omikunda ndhika dha shiga kuumbugantu, odhi na aakulukadhi itaaya ihumbata nawa, yakwetu natu lundululeni,” Mbowe ta kumagidha ngaaka.
Omanga a li ta po pi ngaaka, aasamane oyendji ya li poshigongi mpoka oya koleke kutya shoka tashi popiwa oshoshili oye li momagumbo taya thindilwa kongudhi, taya monithwa iihuna kaakulukadhi yawo.
Omusamane gwomukokele a za momukunda Oshitowa edhina lye lyi shiwike kuKundana, okwa ti, shoka sha popiwa moshigongi itashi holoka ashike megumbo lyontumba ihe omomagumbo ogendji momundhingoloko gwawo.
“Uukulupe nani uupyakadhi, oshoka ngeno okwa li oyendji taya monithwa iihuna paife ye li natango miilonga haya mono iiyemo, ngeno oya simanekwa natango,’’ ta popi ngaaka.
Ta ti, aanona paife momagumbo nayo kaye na omikalo naasamane oshoka oya landula momikalo dhooyina.
Anuwa aasamane kaye na shoka haya eta momagumbo, nonando haya kambadhala okutula po shoka ye na uuna ya kwata openzela.
“Sho osho shoka nduno she ya fala kaanahambo, ya hala aanyasha mboka anuwa ye na po sha, ashike naya kale ye shi kutya omulumentu ke na epenge,” ta gwedha ko ngaaka.