WINDHOEK
Uuministeli wElongo metitatu oshiwike sha zi ko owa shaina elongelokumwe lyoomvula ntano nEndiki lyOmbaanga yOtango yOpashigwana (First National Bank Foundation -FNB) nokwa li wa pewa otjeke yokapandi komiliyuna yimwe oshikwanu omilongo mbali nantano (N$1.25 million). Oshimaliwa shika otashi ka longithwa mokudheula aakuluntusikola shi nasha nokulela omanongelo gawo.
Oshiwike sha tetekela esiku ndyoka, Uuministeli mbuka owa pewelwe ishewe oshimaliwa N$1.5 million okuza kehangano lyoOld Mutual omolwelalakano lya faathana.
“Konima yoomvula 17 dhemanguluko, Namibia okwi iyadha monkalo yomashongo omanene moshikondo shelongo. Nonando pwa ningwa omalunduluko gwontumba mooproholama dhelongo muule womimvo dha pita, oshikondo shika natango iiyimati yasho oya nkundipala. Oshimpungu shimwe shoka sha tothwa mo sha pumbwa eyambidhidho lyomeendelelo osho okunkondopaleka ewiliko neungauneko lyoshikondo shika,” Ominista yElongo Nangolo Mbumba ta ti poshituthi shegandjo lyomagano ngoka.
Omunashipundi gwelelo lyoFNB, Dieter Voigts, oshowo omukuluntuwiliki gombaanga ndjika, Vekuii Rukoro pamwe naaleli yamwe moshikondo shelongo oya li poshituthi shika.
“Omadheulo ngaka guuleli osheetwapothaneko shoka tashi hiya aawiliki ya pendule po onkalo yelongo moosikola shi nasha newiliko nomakwatathano ga ndjunguka, nomalalakano ngaashi goprojeka yelongelokumwe lyopamuhanga, omakwatathano, endungiko nedheulo oshowo omapendulopo guuwiliki nedheulo, sha kwatela mo omikalo dhekandulopo lyomikundu oshowo ekwatelomo lyoshigwana momikalo dhekatukonkatu lyeilongo,” minista ta ti.
Omadheulo guuwiliki otaga ka ningwa mekwatathano nOunivesiti yaJohannesburg.
“Etegameno olyo ndika kutya Ounivesiti yaJohannesburg otayi ka tula po ekwatathano lyethimbo ele nOkollegi yUulongi mOvenduka nokonima ookollegi oonkwawo ndatu dhelongo moshilongo. Pethimbo ndika otu na aakuluntusikola ye li 30 mboka yi inyolitha meilongo lyoDiploma yi nasha nEwiliko lyOsikola (Diploma in School Management) okuza miitopolwa ngaashi Erongo, Kunene nOshana,” osho minista a tseyithile mboka ya li poshituthi shoka.
Pamaiyuvo gaMbumba, oshituthi shegandjo lyoshimaliwa koproholama ya tseyika nedhina ETSIP oshi li euliko lyeitulomo enene lyehangano ndika lyoFNB mepungulo lyopankalathano.
Niitya yontumba shi nasha nelongitho lyoshimaliwa moshimpungu shelongo, omunashipundi goFNB Foundation, Jutta Rohwer, okwa tsu omuthindo kutya oFNB oya ulika oshinakugwanithwa shayo shopankalathano okukwatha nokuyambula po omithika dhonkalamwenyo yoshigwana shaNamibia.