ONGWEDIVA – Elelo lyondoolopa lyOngwediva Etiyali olya tyapula Okili nokugandja omagano kaakulupe yomOngwediva. 

Okili oya li ya tyapulilwa mOngwediva, sho kwa li kwa hiywa kehe omukalimo gwOngwediva e na omimvo 60 okuya pombanda. 

Mayola gondoolopa yOngwediva omupe, Naemi Amuthenu opamwe nookansela dhe, oya li ya kala pamwe naakulupe mbaka, e taya popi iipopiwa shi na sha niilonga yondoolopa ndjika yokuhumitha komeho oonkalamwenyo dhaakalimo. 

“Otashi kala oshinakugwanithwa shetu okugwanithila po aakalimo yondoolopa ndjika shoka ya hala notaya pumbwa. 

Otatu kala tatu ningi iigongi tatu pulakene koshigwana opo tu vule okukutha omatokolo ge li mondjila notaga kandula po uupyakadhi osho wo okuhumitha komeho ondoolopa yetu,” Amuthenu ta ti ngaaka. 

Ta ti, oya li ya longekidha Okili yaakulupe oshoka oya hala okuulikila aakulupe ohole osho wo okutyapula pamwe. Simson Petrus ngoka a pewa omagano esiku ndyoka okwa ti shika oshikando shotango ta pewa omagano gOkili, onkene okwa nyanyukwa. 

“Naakwanezimo yandje ihaye shi ningile ndje. Olundji ohandu uvu ashike aakulupe taya ningilwa Okili kelelo lyondoolopa, nani omimvo dhandje opo ngaa tadhi gwana,” ta popi ngaaka. Ayehe ya li poshituthi mpoka oya li taya ulike enyanyanyu nombili. 

Omugandji gomauyelele melelo lyondoolopa lyOngwediva Ottilie Shingenge okwa ti, omumvo gwa yi oya li ya hogolola okuningila Okili aantu taya lumbu nuulema wa yooloka, oshoka okwa li ya hala wo yu uve ombili. “Olundji otwa kala tatu ningile okili aakulupe, ihe omumvo gwa yi otwa li twa tokola tu ningile aantu ye na uulema oshoka inatu shi ya ningila nale, natango omumvo tagu ya otatu ka ningila wo yalwe oshoka otwa hala kehe gumwe u uve uugumbo wuukalimo womOngwediva,” ta fatulula ngaaka. 

-vkaapanda@nepc.com.na