Opolisi moshitopolwa shaMusati oya lopota eso lyokanona komvula yimwe noomwedhi sho anuwa ka tulwa omavi momeho, momayulu nomokana kuunona uukwawo wuukwanambwiyu womimvo mbali.

Oshiningwanima osha holoka momukunda Okathitukambanda moshikandjohogololo shOgongo, mOmaandaha.Omukuluntu gwopolisi moshitopolwa shaMusati Ismael Basson okwa ti aanona mboka oya li ya thigwa ashike nokanona okakwawo komimvo ntano.

Otaku hokololwa kutya uunona mboka omanga kwa li tau dhana, aakwanambwiyu okwa li ya kutha omavi nokutula nakusa omavi mokana, momayulu osho wo momakutsi sigo ka kala itaka vulu okufudha.

Omakonakono gopolisi otaga tsikile. Basson onkene ta tsikile okukumagidha aavali osho wo aakuluntu momagmbo ya kale taya sile oshimpwiyu aanona.

Ta ti, aanona oya pumbwa okukala ye li metonatelo lya gwana ethimbo alihe oshoka uudhano wawo ihau inekelwa, onkene ota ti aluhe aakuluntu taya thigi po aanano omolwiinakugwanithwa yilwe naya kale haya thigi aanona naakuluntu.

Iiningwanima yomaso gombaadhilila gaanona ohayi lopotwa olundji, ihe okwa ndhindhilikwa aavali itaaya sile aanona oshimpwiyu sha gwana.Ohaku lopotwa aanona yomimvo omishona ya gwila momayemele gomeya nenge momaluyo gontaku osho wo momatale omanga ye li oyo a yeke, nolundji ohaya thigwa mogumbo mwaa na etonatelo lyaakuluntu.

-vkaapanda@nepc.com.na