ONDANGWA -Aakwanezimo yaanona yaali ta ya fekelwa ya dhipagwa kuhe omumvo gwa zi ko muSeptemba, otaya pula kutya oshike ompangu itaayi konaakona iipotha ayihe ya patululilwa omutamanekwa. 

Thomas Sheya (33) ngoka anuwa a dhipaga uunona we, gumwe gomimvo mbali na gumwe gomimvo ne, okwa holoka mompangu yOndangwa Omaandaha komeho yamangestrata Nelao Ya Frans ngoka, ngoka a undilile oshipotha komasiku gatano gaAguste nuumvo. 

Sheya anuwa okwa li a kutha uunona we koWindhoek e teke wu dhipagela komukunda Onkani moshitopolwa shaShikoto. 

Johanna Ndashiwa omumwayina gwa yina yaanona ya dhipagwa okwa ti, opolisi oya longo onkudhu oshoka okwa li a lopotelwa oshiningwanima tango omanga aanona iinaya dhipagwa ihe inayi kutha onkatu ya sha. 

“Mumwameme okwa shunuka moompango, sho kwa li ta mangelekwa kuSheya iikando ayihe iyali, etayi kopolisi koKaturura hoka ye mu shunitha ko kutya ita vulu okuyakulwa oshoka okwa zi kOkuryongava, anuwa naka kwathwele kopolisi yaWanahenda,” ta hokolola ngaaka. 

Sho anuwa opolisi ya thiki pegumbo oyaadha nale aanona ya ya nahe kOwambo, ashike yina okwa li a pula opolisi yi ningi omboloka opo uunona ewu kuthwe oshoka okuna uumbanda pamwe oteke wu ningila omiyonena, ihe opolisi inayi shi ninga. 

Ndashiwa ota ti, ngeno okwa li opolisi ya yi molukongo nokuninga oomboloka, ngeno aanona mboka inaya dhipagwa. 

“Oshike oshipotha shekembadhalo lyedhipago sha patululilwa Sheya, ku yina yaanona ihe itashi popiwa mompangu, ihe otaku popiwa ashike oshipotha shomadhipago gaali,” ta pula ngaaka. 

Ta ti, shoka otashi ti, oshipotha shiya osha kana nenge ongini? 

Omumwayinagona gwa yina yaanona Hilia Gabriel okwa ti, Sheya ina pumbwa nando okupewa eyifutilemo modholongo nando esiku limwe, okwa dhipaga aanona yaana ondjo ya sha. 

“Oshike inaaya nomilema dhe oye awike, aanona oye mu ningi shike,” ta popi nomahodhi taga popoloka. 

Aakuluntu ya li pompangu mpoka oya popi kutya Sheya okwa longo oshilonga shi nyanyaleka, itashi vulu okudhidhimikilwa noku taambwa ko komuntu, onkene na kale ashike modholongo ina za mo. 

vkaapanda@nepcc.com.na