WINDHOEK Nonande aantu omayovi haya kwata openzela mboka ya kala tya mbombolokele komahala nkoka taku inyolithilwa otaya nyenyeta omikweyo omile, ombelewa ndjoka ya pewa oshinakugwanithwa shika shokunyolululitha aanapenzela otayi ti kutya kape na omuntu ta ka kala ina shangithwa okuthika pehulilo lyoshikonga shika. Okuza iiwike ya zi ko, aakulupe moshilongo ashihe oya kala nokunyolithwa opo ya vule okukala haya mono oshikwiila shawo shokomwedhi N$350. Omukuluntuwiliki gOshikondo shOkukwatitha aakulupe moUnited Africa, Gerry Munyama moonkundathana noshifo shika okwa shilipaleke kutya ombelewa ye otayi ka shilipaleka kutya aantu ayehe mboka haya kwata openzela oya shangwa. Nelalakano okunyolitha aakwati yopenzela ye li 180 000, ope na oosipana 22 moshilongo ashihe, naMunyama ota ti oshikonga oshi li eshongo kuyo. Ta gwedha po kutya omatembuko gaantu inashi tegelelwa otashi vulika ga ka etithe omakatasho inaga pumbiwa pomahala gokwiinyolithila. Ta yelitha kutya omanga nee osipana ya thaneka okuyakula aantu yomuyalu gwontumba nokuyalula ethimbo ndyoka ye na okulongitha pehala limwe, omolwomatembuko iinakugwanithwa mbyoka ohashi vulika yi mbalipale, nohashi kateke osipana yi vule okuya kehala lya landula ko. Omikweyo dhika odha faathana nopethimbo lyomahogololo, okuza sho omukalo gweinyolitho gwa tamekele nokunyenyetwa kutya aakulupe ohaya kala momikweyo omile ya tegelela aanambelewa yoUnited Africa ya tameke oku ya shanga. Munyama ota ti omikweyo omile itadhi vulu okuyandwa, oshoka aantu oye na okushangwa opo ku shilipalekwe kutya aantu mboka haya mono openzela oyo tuu shili ye yi nuninwa. “Omukalo nguka otashi vulika gwa etitha shili omaiyuvitonayi, kakele otu na okushilipaleka kutya aantu oya mona omauwanawa gawo gopenzela,” Munyama ta yelitha. Kakele komashongo ngoka gaali, onkalo yefundja moshitopolwa shaCaprivi inayi tembudha ashike aakalimo mboka ye li komunkulo gwomulonga Zambezi, ihe omahala mpoka pwa li pe na okushangelwa aantu oga tembuka wo nokuya komahala galwe. “Nande ope na omashongo ngaka, otatu ka shilipaleka kutya kape na omuntu ta kala ina nyolwa. Inatu hala nando pu kale omuntu ihaa mono openzela ye,” Munyama ta ti. Eishangitho ndika otali ningwa nelalakano unene okutotha mo “iiluli” mbyoka hayi kwata nando oya mana nale oondjenda. Omimvo dha zi ko, opwa kala aantu mboka ihaya vulu okuthika komahala gopenzela omwedhi kehe, nopwa tulwa aantu mboka haya ye ya kwatele ko iimaliwa ihe ihaye yi thikitha kooyene. Oshikwawo, opwa kala iiningwanima yimwe aantu haya si ndele aakwanezimo yawo ihaye ya lopota naashika ohashi etitha omuntu a kale a sa ihe openzela otayi tsikile ashike. Oshikonga shika, Munyama ta yelitha otashi lalakanene okukonakona mboka ye na okumona iimaliwa yawo nokuvudha mo omadhina gaamboka haya kwata nando oya mana oondjenda. Shika otashi ningwa opo oonzo dhepangelo dhi gamenwe nokutopolelalwa ashike mboka ya nuninwa okukwata openzela. Omukalo gokushangulula aakwati yopenzela ohagu ningwa konyala konima yoomvula ndatu kehe, neishangitho ndika olya hulile eti 28 Febuluali nuumvo moka aanambelewa kwali taya yakula unene aakulupe mboka ihaya vulu okuza momagumbo.