OSHAKATI – Minista gwomalelo goondoolopa nomayambulepo gokuushayi Erastus Uutoni okwa patulula pambelewa ehala lyokulandithila iihulunde oshowo okapana moTsumeb.
Ehala ndika olya patululwa pambelewa mehuliloshiwike, notali ka gandja omahala kaalandithi ye li 105.
Omahala ge li 48 gomomwaalu ngoka otaga ka gandjwa kaalandithi yiihulunde omanga ge li 10 taga ka gandjwa kaalandithi yokapana.
Omahala gaheyali otaga ka gandjwa kaalandithi aashona omanga ge li gane taga ka gandjwa kaalandithi ye na iilandithomwa oyindji.
Pepatululo, Uutoni okwa li tumbaleke esimano lyaalandithi yomomapandaanda na nkene ye na okuyambidhidhwa opo ya vule okutsikila okulanditha nelalakano lyokwiihupitha yoyene.
“Omatala ogo ehala lya simana moshigwana oshoka ohali gongaleke aalandithi ya adhike pehala limwe, natango ohaga wapaleke nokugandja efano ewanawa kelelo lyondoolopa lyontumba,” ta fatulula ngaaka.
Ta ti, okushingitha okwa gandja iilonga moshigwana, oyendji inaaya mona oompito dhiilonga yilwe, otaya longitha ompito yokushingitha opo ya vule okwiihupitha oshowo okugwanitha po oompumbwe dhawo dhilwe.
Uutoni okwa ti, aalandithi mboka aashona ohaya dhana onkandangala onene mekoko lyeliko lyoshilongo. Ta gwedha po ta ti, onkalo yaalandithi ohayi ulike onkatu nomuthika gwondoolopa okupitila momayambidhidho.
“Omalelo ga yooloka mwa kwatelwa gopashilongo, gopashitopolwa oshowo gopandoolopa oge li metifa okuya po nomilandu oshowo ooprogalama ndhoka tadhi ka yambidhidha onkalo yaalandithi, unene mboka ye li monkalo itaayi etitha oonkondo,” ta popi ngaaka.
Uutoni esiku ndyoka okwa li a fatulula kutya uuministeli wawo owu lile po okuyambidhidha oshigwana pamukalo gokuyambidhidhwa okuhuma komeho. Minista okwa kwashilipaleke kutya otaya tsikile okugwanitha po iilonga yawo, nelalakano lyokuhumitha komeho oshilongo oshowo okugandja omayambidhidho gawo mpoka taga pumbiwa.
Aashingithi yomomapandaanda oya li ya pandula komahala gawo omape ngoka ya pewa, oshoka anuwa oya kala nokulila uule nethimbo opo elelo lyondoolopa lyawo lyi ya yambidhidhe.
Yamwe oya ti, oya kala nokulanditha iilandithomwa yawo momapandaanda oshoka kaye na omahala.
Iihulunde oya pumbwa ehala lya yela, ihe hamomapandaanda.
vkaapanda@nepc.com.na