Aalandithi yokapana mOvenduka oye li monkugo yin a onkambe, sho ongeshefa yawo ya gu pevi, shoka taya hokolola kutya osha etithwa komukithi gwoCovid-19.
Mboka ya popi naKundana sho a talele po omatala gwopoSingle Quarter moKatutura moshilandopangelo oshiwike shika oya hokolola kutya ongeshefa yawo oya gwa pevi ngashiingeyi oshoka oonakulanda oya ninga aashona lela.
Oya hokolola koogumwe noogumwe kutya monale omanga omukithi gwoCovid-19 inagu ya okwa li haya landitha nuudhiginini ye na aalandi oyendji Aanamibia noshowo aayendinandjila ashike ngashiingeyi, aalandi yawo otaya yalulwa oshoka aantu oya tila okukwatwa kombuto ndjoka ya tumbulwa pombanda.
Sho Kundana a talele po ehala ndyoka okwa adha nduno aalandithi yonyama natango taya tete ngaaka uusitiki wokulola noshowo taya landitha kaalandithi ya yooloka.
Ashike shoka tashi nywitha omakutsi ooshoka kutya aalandithi mbaka itaya vulu okulongitha iikwatho-kondjithi yombuto ndjika mbyoka ngashiingeyi oyo tayi lombwelwa aantu ya longithe mokukala inaya kwatwa kombuto ndjoka.
Daniel Hipopiwala ngoka a landitha okapana uule womvula 19 okwa hokolola kutya onkalo ndjika ine yi mona nale ya tya ngika onkene okwa kumwa oshoka kapu na we aalandi ya gwana.
“Aaleli yetu naya kambadhale ya tule po oompangela dha kola ndhoka tadhi keelele ombuto ndjika yaa indjipale unene, oshoka otatu ka sa ondjala moshilongo shetu muka ngele onkalo ya nayipala,” osho a hokolola ngaaka newi lyolukeno.
Okwa ti kutya ongeshefa ndjika oyi na uuhupilo wa kola moka omafamilia gawo haga hupu ihe ngele oya pata nena aakwashigwana oyendji otaya ka sa ondjala.
Ashike yamwe yomaalandi oya hokolola kutya oshihwepo ngele omatala ngaka ga pata manga oshoka ngele inaga pata nena aantu oyendji otaya ka kwatwa kombuto ndjoka oshoka aantu itaya vulu okwiigamena molwomundilo noshowo olwithi.
Aalandithi oya itaala kutya ngashiingeyi otaya vulu okulongitha omanyala oshoka otaga pi komundilo, yo ishewe itaya vulu okulongitha omamask oshoka otaga yiwa kolwithi noshowo kuupyu womundilo sho taya longo.