Charles Ndeumane
Omukuluntu gokangundu kaakuluntuwiliki komahangano ga yama kepangelo Fluksman Samuehl okwa ti opo omahangano ngoka ga ye komeho, aawiliki naya longele uuyuki omahangano gawo ndele haamboka ye ya pa ooposa ndhoka.
Samuehl okwa popi ndhoka pethimbo a li ta patulula oshigongi shawo oshitimugoyi mOshakati oshiwike sha za ko.
Oshigongi shoka shokomumvo osha nana nokweeta pamwe aaleli yomahangano ga yama kepangelo ye li 57 oshilongo ashihe, ya vule okukundahana nokulongathana nkene ye na okuhwepopaleka oonkalamwene dhaakwashigwana.
Okwa ti ngele iilyo yewiliko ya puka oya hogololwa ohashi eta iizemo iiwinayi kehangano ndyoka. Ta ti mboka haya hogolola naya kwashilipaleke kutya iilyo yewiliko oyi na uunongo, uulongelwe, osho wo ontseyo yomilandu dhomahangano ngoka taya hogololelwa.
“Osha simana opo iilyo yewiliko yi kale hayi longo nuudhiginini, nuuyuuki, notseyo opo ya vule okulonga paushili noneendelelo yo ya vule okugandja omukumo kaaleli yomahangano,” a ti ngaaka.
Samuehl ta ti nonando ya tsakaneke omaudhigu komahangano omashona ga yama kepangelo, ogendji oga za po ponkantu mpoka nangashiingeyi otaga lelwa nawa nokweeta iiyemo yi li nawa.
“Omahangano og ena iinakugwanithi ya simana unene tuu momahupilo goshilongo nokugandja omayakulo koshigwana moshilongo, aaleli mboka ya kwatela komeho ngashiingeyi omahangano ngoka otaya vulu okuhumitha komeho oshilongo. Otandi pandula aaleli mbaka,” a ti ngaaka.
Amushanga gokabine te George Simata poshigongi mpoka okwa ti omahangano ga yama kepangelo naga longele kumwe ga yambidhidhe epangelo.
Simata ta gwedha po kutya aaleli yomahangano naya yoolole pokati kepangelo tali idhopo nokuyambidhidha omahangano, oshoka epangelo olyi na oshipambu oshinene momahangano ngoka nankene tali kala nokuyambidhidha omahangano galyo ngele taga nyengwa okwiilela.
“Otandi longitha oshitya okuyambidhidha oshoka aantu inaya dhiladhila kutya p pinto yimwe onatu ka idhopa melelo lyomahangano ngoka, oshoka oya itaala nale kutya epangelo otali kala nokwiidhopa ngele iinima itayi ende nawa. Onkene otandi mu indile kutya ihatu idhopo ihe ohatu yambidhidha,” Simata a yeleke ngaaka.
Oshiindingili osha mono aanambelewa yomahangano ngoka taya kutha ombinga momaudhano ga yooloka okuza Etine lya za ko sigo omOlyomakaya.
-ndalikokulep@gmail.com