UUKWIYOONGWE – Osikola Uukwiyoongwe Combined ndjoka yi li ookilometa 15 okuza mOshakati oyi na aalongwa oyendji kaaye na oongaku omanga yamwe yaa na omizalo dhosikola.
Ethimbo lyuutalala olya thikana, naalongwa mboka kaye na omizalo dhiihwapo ohaya hulile oondjilakati omanga yamwe itaaya yi ko kosikola omolwuutalala.
Pethimbo ya li ya gongala posikola taya pewa omagano kehangano lyoRani, Etitatu, oyendji yomaanona mboka otaya monika inaaya zala omizalo dhi ihwa po, omanga yamwe kaye na moongaku.
Omukuluntusikola posikola mpoka Albertina Hamalwa okwa ti olundji ohaya iyadha taya kumagidha aanona opo ashike ya taambe ko onkalo oshoka aakuluntu yawo itaya vulu oku ya gwanithila oompumbwe.
“Ohandi ya kumagidha ashike ya kale taya matuka okuya kosikola, opo kaya uve uutalala oshowo uululume womamanya, unene mboka haya ende oondjila oonde,” ta popi ngaaka.
Omulongisikola gumwe ta ti, onkalo otayi etitha ohenda ihe kaye na nkene ye na okuninga.
Ta ti, nonando ya kala nokwiindila aakaluntu ya lande oongaku, yamwe ashike yomuyo ye shi ninga.
“Otu wete kutya aavali yamwe oya hala okuyambidhidha aanona yawo ashike oya nyengwa,’’ ta popi ngaaka.
Omulongi ngoka okwa popi kutya yamwe kaye na iizalomwa, ihe shoka itashi shololitha ashike ihe otashi nkundilipaleke omadhiladhilo gaalongwa kaaya itule mo meyilongo lyawo.
“Oomwenyo dhetu ongaalongi nadho kadhi kala dhi na ombili ngele tatu longo, sho twa tala aanona yetu ye li monkalo yi li ngaaka,” ta ti ngaaka.
Ta ti, osikola yawo otayi ka pandula kehe ngoka ta ka yambidhidha aalongwa yawo. –vkaapanda@nepc.com.na