OSHAKATI – Yamwe yomaakiintu mboka ye ya montaneho kombinga ongeshefa yokulanditha omalutu gawo, oya ti yamwe yomuyo oya mana osikola kiiputudhilo yopombanda.

Aakiintu aagundjuka oyendji otaya longitha epandja lili koWhatsApp, tali ithanwa “Hookups’’ hoka haya kwatathana nawa ‘naalandi’. Soini Thomas (a gandja edhina lyaa shi lyoshili) okwa ti, okwa mana koshiputudhilo shopombanda shaUnam omimvo ntano dha piti, ihe sigo onena ina mona iilonga, nonando a kala nokwiithanwa komapulaapulo.

“Onda tameke okulanditha olutu lwandje omanga ndi li mosikola, ashike okwa li handi shi ningi momukalo gwa yooloka oshoka kanda li nda manguluka.

Onda kala handi futitha aalumentu tandi yi nayo miihulo opo ndi gwanithe po oompumbwe dhandje dhosikola, oshoka kandi na aayakuli – aakuluntu yandje oya hula ko nale,” ta hokolola ngaaka.

Ta ti, sho a mana eyilongo lye, okwa kala nokukonga iilonga ihe ita mono, okwa tsikile okulanditha olutu lwe a manguluka. Ta gwedha po ta ti, omanga ya lombwelwa kaaleli yoshilongo ya yooloka ye ye po niilonga yawo yene, oye ya po naambyoka yiihulo, taya landitha omalutu gawo.

Ta popi ta ti, sho a mono ongundu tayi taambathanwa komalungula tayi pula ngoka a hala okulanditha olutu lwe, okwa landula mo. “Epandja ndoka olyi li nawa oshoka otatu longitha oonomola dhopakathimbo nomadhina giifundja, shi vulithe okuya momapandaanda tu wetike kukehe gumwe,” ta fatulula ngaaka.

Maria Akweeke naye ta landitha olutu lwe okupitila kepandja hoka okwa ti omukalo ngoka ye ya po nago omwaanawa oshoka otaya longo nuupu, ongeshefa otayi ende nawa.

“Shika tatu ningi hasho twa hala, ihe katu na nkene, otatu hupu ngiini?” ta pula ngaaka.

Ta ti ngele a mono iilonga yi li nawa opo ashike ta hulitha po okulanditha olutu lwe. Akweeke okwa ti, nonando ehalo lyokuhulitha po iilonga mbyoka oku lyi na,

ke na nkene, oshoka ota kongo uuhupilo. “Ondi na uunona hawu yi kosikola, olye te u sile oshimpwiyu ngele itandi kongo omboloto. Oohe kandi shi mpoka ye li, kape na nando ogumwe ha yambidhidhwa kuhe,” ta popi neyeme.

Ta gwedha po kutya ngele ope na ngoka ta vulu oku mu pa sha ota pandula noonkondo, oshoka anuwa olutu lwe olwa loloka.

Kakukutu komatanga gopolisi moshilongo Joseph Shikongo okwa ti, okwaa na iilonga itashi ti landitheni omalutu geni. “Kandi na natango uuyelele wothaathaa kutya ope na oongundu dhi li ngaaka, ihe ondi shu uvite ashike, onkene itandi vulu oku shi koleka, oshoka olopota yi li ngaaka inayi thika mo mombelewa yandje natango,” ta popi ngaaka.

Shikongo ta ti, nonando moNamibia inamu pitikwa okulanditha omalutu, kape na natango ompango tayi ti aantu inaya landitha omalutu gawo. “Nonando opolisi oya lopotelwa aantu taya landitha omalutu gawo pehala lyontumba, kayi na uuthemba oku ya manga po nenge oku ya ninga sha,’’ ta fatulula ngaaka.

Ta kumagidha ta ti, ongamuvali, shoka tashi ningwa kaanona oshapuka, otaya tula oonkalamwenyo nonakuyiwa yawo moshiponga.

Omukuluntu gwopolisi moshitopolwa Oshana Naftal Lungameni Sakaria, okwa popi kutya oshi uvithi nayi, okuuva aanona yaanyasha taya teya po oonkalamweyo dhawo noku dhi tula moshiponga nomukalo gu li ngaaka.

“Ngele aagundjuka oya thika konkalo yokulongitha omalungula okulanditha omalutu gawo, osha uka kuuwinayi, ondi shi uvite ashike tashi popiwa ihe kandi shi ngele moshitopolwa shOshana osha thika mo,” ta ti ngaaka.

Lungameni okwa indile aanyasha mboka taya landitha omalutu gawo momukalo ngoka kutya, naya hulithe po onkalo ndjoka, e taya kongo omukalo gumwe gokuhupa, omanga taya tala kutya otaya yambidhindha ngiini, okuhwepopaleka onkalo yokwaa na iilonga.

-vkaapanda@nepc.com.na