Paulina Ndalikokule
OSHIKANGO – Aalonasikola tayi ilongele eithano lyuupangi koshiputudhilo shedhina Alba Chipamba otaya gandja uusama koshiputudhilo shoka omolwa omatokolo haga ningwa, ngoka taya ti kage li muuwanawa wawo.
Aanasikola mboka ya popi naKundana ina yahala omadhina gwawo gwatumbulwe molwa uutile kutya taya tidhwa mo moshiputudhilo shoka otaya ti oshiputudhilo ohashi longitha uukayamukulwa, ihashi pulakene omadhiladhilo nenge iiyetwapo yaailongi, sho ihashi gandja iilongithomwa yomondjila ngele taya idheula. Aanasikola taya ti omukalo tawu longithwa koshiputudhilo otawu keya etela ya ndope yo yaka kanithe iimaliwa yawo.
Otaya hokolola nkene oshiwike shazako ya tseyithiliwa oku pitila metumalaka lyashangwa kepandja lyokoWhatsapp kutya aalongwapangi yeli momvula ontiyali nayi ilopote kiipangelo Engela nokapangelo kaShakati mEtiyali lyoshowike shoka opo anuwa yaka tameke omaidheulo noka taga ka ninga iiwike iyali.
Aanasikola taya ti etokolo ndjoka olya ningwa inaali dhiladhilwa nawa oshoka oya adhikwa yeli mefudho iiwike mbyoka tayi popiwa, taya ilongekidhile oku ka shanga omakonakono geli ko oku za mefudho.
Aanasikola mbaka oya nyenyeta woo kutya osikola kayi na iilongithomwa posikola yagwana unene tuu ngele taya shanga omakonakono moka yena oku ulika nkene iilongithomwa yomiipangelo hayi longithwa.
“Oha ya vulu oku longitha nande okangodhi kamangelwa owala kokatemba, ashike oto lombwelwa kutya okangodhi oke lilepo oshifudhitho, pehala owala lyoku landela osikola iilongithomwa yomiipangelo yoyene. Oha tu vutu iimaliwa oyindji. Omuntu oto otwiiyadha owala wandoopa, to ke endulula iilongwa ashike omolwa owala iinima yosikola inaayi yela,” gumwe a ti ngaaka.
Omukwatelikomeho woshiputudhilo kOshikango Aina Kuutondokwa mekwatathano naKundana okwa ti oshiputudhilo osha shendje omuniilonga ngoka hagandja omatumwalaka kaanoasikola, shoka sha etitha opo ya pewa elombwele ndyoka komunute gwahugunina. Ashike nande ongawo, aanasikola oya kala nale yeshishi kutya otaya yi komayidheulo.
Kuutondokwa okwa pe wo aanasikola ombedhi sho ya fala uupyakadhi wawo kiikundaneki t ti naya longithe omikalo dha tulwa po oku gandja omakemo gawo.
“Oyena omukalelipo gwanaasikola, naya longithe omuntu ngoka ngele oye na uupyakadhi,” ta ti ngaaka.
Kombinga yiilongitho inayigwana oku shangitha aanasikola ekonakono Kuutondokwa okwa ti iiputudhilo oyindji konyala kayi na uupangelo moka aalongwa haya ilongele sho osho haya tumwa yaka idheule kiipangelo.
“Out na po iilongitho ayihe yopetameko, nongele kashi po ohatu kwashili paleke kutya aanasikola otweya tseyithila. Oshi pututhilo shika osha pitikwa koNQA oku gandja elongo,” a ti ngaaka.
Ashike aanasikola otaya ti mboka ya pondola oku ya komaidheulo oshiwike shaza ko oyaka kala owala ya thikama pondje yiipangelo esiku alihe oshoka Alba Chipamba ina gandja omadhina gawo kiipangelo mbyoka.
Ota ya ti sho haya gandja omayivo gawo, ihaga pulakenwa nohaya ningilwa nookuli omatitho goku tidhwamo mosikola.
“Otwali twa pula tu tulilwepo oka pakete kokugandja komaiyuvo getu, ashike osikola oyeka hulitha po oshoka anuwa iha tu gandja omaiyuvo ge na oshilonga,” omusikola omukwawo a ti.
ndalikokulep@gmail.com