Omuleli gwongundu yompilameno yoLandless People’s Movement (LMP) Bernardus Swartbooi okwa ti onkalo yuuthikepamwe pokati kaakiintu naalumentu moshilongo oya patela aalumentu pondje, shoka ta shi etitha omalimbililo kombinga yonakuyiwa yaalumentu Aanamibia.
Swartbooi okwa ti uuthikepamwe pokati kaakiintu naalumentu edhiladhilo lya etwa po kaaEuropa, ashike pamuthigululwakalo moka a kokela aakiintu naalumentu ka ye na esiku ya ka kale ye thike pamwe oshoka ina ya faathana.
“Ngele owa tala kwaashoka ta shi inyenge ngaashingeyi kombinga yokanona okamati, oka patelwa pondje momikalo odhindji, oku za koompito dhiilonga sigo okoompito dheilongo. Oshigwana mwa kwatelwa aatunguveta, medhina lyo ku yambula po aakiintu, ota ya thindile aalumentu kongudhi, ashike ondi uvite nawa oshoka ngaashingeyi aantu ota ya tameke oku sila okanona kokamati oshimpwiyu,” Swartbooi ta ti.
Swartbooi okwa popi ndhoka mopaliamende mEtitatu, ta ti aluhe ombedhi yomikundu nomaipumomumwe agehe ge na sha nuukakwashikekookantu oha yi tulwa ashike komapepe gaalumentu nuunona wuumati. “Ota shi etitha omalimbililo kombinga yonakuyiwa yokanona kokamati. Ngele owa tala kooveta ndhoka twa tula miilonga megumbo muka, nomusamane a hokana ota vulu oku lundililwa ekwatokoonkondo koshigwana nande ina monika ondjo mompangu. Medhina lyo ku kondjitha uuthikepamwe aalumentu oya mangwa komulungu, nuuthemba wayo owa tetulwa, osha nika oshiponga,” osho a tsikile ngaaka.
Omuhwahwameki gwuuthemba nonkwalonawa yopaukakwashikekookantu Rosa Namises okwa koleke ndhoka dha popiwa ku Swartbooi, ta ti okanona kokamati oka kala ka patelwa ethimbo ele. “Pamithigululwakalo dhaaluudhe aakiintu oya kala ya talika ko onga aakwatheli naapika yaalumentu momagumbo. Sho nee epangelo lya tula miilonga ooveta dhi kwathele aakiintu opo ya mone uuthemba nuuthikepamwe ngaashi aalumentu, otwa pitilile unene, e ta tu patele okanona kokamati kondje. Ngaashingeyi aalumentu oya pumbwa oku kondjelwa oshoka oya thigwa po moshikumungu shika, sho osho twa totele omahangano go ku yambula po no ku longa aalumentu nuunona wuumati uuthemba wayo,” Namises ta ti.
Pethimbo a li moonkundathana noshifokundaneki shika Namises okwa indile aalumentu ya manguluke eta ya popi uuna ta ya ningilwa omahepeko, ta ti oku shi kutya aalumentu omo ye li moshigwana ta ya ningilwa omahepeko gokolutu nogopamadhiladhilo ashike oye shi mwenena ashike.