Elelo lyondoolopa yaNdangwa olya uvaneka okufala oshitaasi shopolisi kolukanda Omashaka omolwomanyenyeto ga indjipala okuza kolukanda hoka. Mayola gwondoolopa yaNdangwa Ester Auala sho a li a ningile oshigwana oshigongi okwa popi kutya kehala hoka kwa li kwa nuninwa okufalwa oshitayi shopolisi tango, itaku falwa we.

“Omolwomanyenyeto giimbuluma yu uka pombanda molukanda muka, otatu ka eta opolisi popepi opo yi vule okukala tayi yakula oshigwana,” ta kwashilipaleke ngaaka.

Omugandji gwomauyelele melelo lyondoolopa lyOndangwa Petrina Shitalangaho-Mutikisha okwa ti oshigongi shoka shi na sha nehumokomeho lyondoolopa okwa li sha gongalwa kaantu oyendji, mboka ya li ya tseyithilwa omauwanawa agehe taya etelwa kelelelo. “Aakalimo okwa li wo ya popi omaupyakadhi gawo agehe ya taalela, nuunene oya totha mo okweenda kashona kehumo omeho mondoolopa,” ta popi ngaaka.

Ta ti, natango poshigongi mpoka opwa li wo aanambelewa aanene yopolisi mboka ya li ya gandja omalongo osho wo omauyelele koshigwana uuna sha taalela uupyakadhi tawu pumbwa omayambindhindho gopolisi. “Natango okwa li twa faalela aanambelewa yehangano lyokwaandjaneka olusheno konooli (Nored), mboka ya li ya gandja omauyelele kombinga yolusheno osho wo uupyakadhi wolusheno.

Shitalangaho-Mutikisha okwa ti elelo lyOndangwa onkene tali tsikile okulongela aakalimo yawo omauwanawa ngaashi lya uvaneka.

Ta ti, elalakano okuhumitha komeho ondoolopa yawo opo yi kale yi li ponkatu mpoka pe na oondoolopa oonkwawo dha putuka.

-vkaapanda@nepc.com.na