Elelo lyopamuthigululwakalo lyOndonga olya pititha etanda aamati naasamane ya pita po150, mboka kwa li ya ningi omasiku gaali kEkango lyOmongwa, lyi li moshitopolwa shaShana.
Omugandji gomauyelele melelo lyOndonga Ileni Nandjato, okwa ti okwa li ya gongaleke aalumentu, okuza poomvula omugoyi sigo 70.
Ta ti, elalakano lyokupititha etanda, okulundululila aamati ya ninge aasamane oshowo ya kale mombepo yimwe nuukwaniilwa, nuuna taku ka kongwa aalongeli yomukwaniilwa, otaya ka hogololwa maalumentu mboka ya piti etanda.
“Elelo lyopamuthigululwakalo okwa li lya ithana aalumentu ayehe okuza kiitopolwa yokonooli opo ya kuthe ombinga mokupitithwa etanda, naashika okwa li sha ningwa okupitila moradio,” ta popi ngaaka.
Nandjato okwa ti osheendo shoka okwa li sha kwatelwa komeho komunashipundi gwelelo lyopamuthigululwakalo John Walenga opamwe nomalenga omakwawo.
Ta ti, aalumentu mboka oya li ya pitithwa etanda momikalo dha yooloka, ngaashi okulithwa onyama kaayi na omongwa esiku lyotango, oshowo okweenda ookilometa ntano nooshako dhomongwa ngoka ya tapa mekango.
“Onyama okwa li ye yi lithwa opo ya mone esimano nongushu yomongwa,” ta fatulula ngaaka.
Okwa ti, aamati naasamane mboka okwa li ya pewa omalongo nkene ye na okwiihumbata moshigwana oshowo nkene ye na okukala noshigwana.
Okwa li wo natango ya longwa kombinga yomahepeko gaakiintu naanona momagumbo.
Ta ti, etanda oshinima shopamuthigululwakalo onkene okwa li ye shi ningi opo ya galule shoka kwa li hashi ningwa nale opo wo natango shi tsikile.
Otali yelekanithwa wo nokufukikwa, ndjoka pamuthigululwakwalo hamu piti uunona wuukadhona opo wu talike ko onga aafuke nenge aakiitu taya vulu okuhokanwa nokuninga omalugo.
“Ohatu longo aakadhona nkene ye na okulela uunona uushona osho wo esimano lyokusimaneka ondjokana,” osho Namunganga a ti ngaaka.
Okwa fatulula wo kutya aanona mbaka haya yi kolufuko kaye na oohonda nangele ope na ngoka e na omalongekidho gokuninga ohango nena ota vulu okuya kolufuko ye ta ka tsikila oku ka hokanwa.
“Otu na aanona yaakadhona aanasikola taya kutha ombinga molufuko nokonima yomauliko ngaka otaya shuna kosikola nokumana elongo lyawo opo ya ka kale aanashilonga nonakuyiwa,” ta ti ngaaka.
“Monale aakadhona inaya kala nokuthiminikwa ya ye kolufuko, oya kala ye na ehalo okuya nomongashiingeyi natango ihaya thiminikwa. Okwa li ashike haya thiminikwa kaavali yawo okuhokanwa kaantu inaaye ya panda, oshoka nale iikulya oya li ya pumba,” ta ti ngaaka.
vkaapanda@nepc.com.na