ELIM – Aanamapya oya holola enyanyu nokuhambelela omuloka omwaanawa sho Shiyenga shaNangombe e ga dhenge pevi okuza pehulilo lyomumvo gwa yi sigo opetameko lyomvula ndjika.

Aanamapya oyendji oya tameka okupulula omapya gawo omanga yamwe ya tula nale etemo komupini.

Iishana oyu udha omeya niimuna oya paluka nawa komalutu. 

Loide Ekongo gwomomukunda Iihanguti moshikandjohogololo Elim okwa ti ota hambelele Pamba komuloka omwaanawa oshoka oya kala ya tila oshikukuta shi tsikile sho ya kala ya taalela ondjala omimvo dha zi ko.

“Itandi mana po ethimbo, iilonga oya tameka. Onda hala sho omvula tayi ka sheka niilya yandje oyishi okutalwa, se tu vule oku mona po sha sho kutu hupitha,” ta popi ngaaka. 

Sonia Mateus gwomokunda Onaanda okwa ti, iilya ye oya mena nale, oshoka okwa li a tameke okulonga epya lye sho omata gotango ga loko omumvo gwa yi.

“Onda li nda tameke okulonga kuyele oshoka onkalo yombepo ndjika ihayi inekelwa , ohayi lunduluka omumvo kehe, onkene onda hala ndi adhike nda likola mo sha,” Mateus ta popi ngaaka. 

Ta gwedha po kutya omvula ndyoka ya loko omasiku ga yi oye ya pe omukumo kutya nuumvo onashi ka enda ngaa nawa.

Aanafaalama yomomapya mboka inaaya tameka okulonga momapya gawo oya ti, oya tegelela omuloka gwa landula ko opo ya pulule omapya gawo. Taya ti, nonando ya mona omukumo, uumbanda inau hula po thiluthilu, ngele omvula inayi loka natango otaya hepitha iimaliwa yawo.

Ookansela ya yooloka okupitila mooradio, oya kala nokugandja olupandu omolwaShiyenga ngoka e ga dhenge pevi, oshiwike shika.

Taya ti, omadhiilaadhilo guumbanda okukanitha iimuna yawo omolwondjala oga kana po, omolwomuloka omwaanawa.

“Omata ngoka otaga ulike kutya otwa tegelela omvula oyindji. Omvula itayi vulu okuloka ashike e tayi mwena. Ondi inekela kutya otatu ningi aanelago,” omunafaalama Joseph Endjala ta popi ngaaka.

Endjala ta ti, ngele omvula oya loko natango iikando iyali nenge itatu momasiku tage ya, omwiidhi nago otagu ka kala gwa tsapuka nawa, niimuna oto yi imonene okuza kokule. -vkaapanda@nepc.com.na