OSHAKATI – Omupevipresidente Netumbo Nandi-Nandi Ndaitwah okwa patulula oshitaasi shopolisi Etitano kOnawa, ndyoka ya tungwa kaanangeshefa yokonooli, Sash Trading cc oshowo Ziara Energy and Investment (PTY)LTD kongushu yoshimaliwa shoomiliona N$3.5.
“Shoka sha longwa mpaka nena oshinene, ihe otandi ndopa ngele itandi pandula omahangano ngoka ga tsakaneke epangelo ondjilakati, okutunga oshitaasi shopolisi opo oshigwana shi kale shi li megameno, sho shi mone wo omayakulo galwe,” ta pandula ngaaka.
Ndaitwah okwa pandula ngaaka sho a li ta patulula ositaasi yopolisi oshowo omagumbo goBuild Together pambelewa kOnawa mehuulilo shiwike.
Aakalimo yokOnawa oya ningi ethimbo taya lili uuthigona wegameno lyopolisi sho aafuthi ya tameke taya indjipala momundhingoloko moka.
Omunangeshefa Abraham Shaanika gwoSash Trading cc, okwa ti oya li ya ndhindhilike ompumbwe yositaasi kOnawa, omolwa iiningwanima iiwinayi ya kala tayi ningilwa aakalimo, sho osho nduno sha pendula omandhindhila gawo opo ya yambindhindhe ngaaka.
“Otwa tsakaneke epangelo ondjilakati, oshoka ita tu vulu okulyeethela po omanga ta tu vulu okuyambindhindha naashoka tuna po,” ta po pi ngaaka.
Maria Shikoyeni omukalimo gwokOnawa okwa ti, oombundhi odha pimbile sho omalukanda ga tulwa mumwe.
“Ihatu thigi we iinima yetu pondje kashina ethimbo lyomutenya. Ngele etango tali kapa oyana na se ota tu tondoka tu thike megumbo oshoka ota tu yugwa iinima yetu,” ta hokolola ngaaka.
Ta ti, osha kala oshidhigu okukalopota iningwanima kOshakati oshoka okokule, ta gwedha po ta ti oya pandula sho opolisi ya etwa po pepi.
Frieda Titus ngoka a mono egumbo lye okwa ti, okwa pandula elelo lyondoolopa lyaShakati sho lye ya pe omalukalwa okupitila moprogakaa yoBuild Together.
“Ka kwali ndishi ngele nandi ka likole egumbo monkalamwenyo, ihe nena ongame nguka. Onduuvite nawa shili,” ta po pi nenyanyu.