ONGWEDIVA – Elelo lyondoolopa lyOngwediva olya yambidhidhwa kehangano lyoRani Group niikwatelwa yiimeno osho wo iikwamboga yi li 2 000, mbyoka tayi ka gandjwa kaakalimo ya tsike momalugumbo gawo.
Omugandji gomauyelele melelo lyondoolopa lyOngwediva Ottilie Shingenge okwa ti, Rani okwa yambidhidha ngaaka okukwathela aakalimo mboka taya ka tsika iiyimati niikwamboga osho wo omiti momalugumbo gawo.
“Okutsika iiyimati niikwamboga otaku xwaxwameke onkalo yiikulya osho wo okwiindjipaleka iikulya yi na uundjolowele shoka tashi hwepopaleke wo uundjolowele waakalimo,” ta fatulula ngaaka.
Ta ti, omayambindhindho ngoka oga gandjwa okupitila moprogalama ya totwa po kumayola gondoolopa Naemi Amuthenu, okukandula po ondjala okupitila mokunduluka iikulya moshilongo.
Shingenge okwa ti, oprogalama ndjoka oya totwa po sha landula etokolo lya ningwa kepangelo okunduluka iikulya opo kwaa pitikwe ondjala moshilongo osho wo okuya po noompito dhilwe.
Omupresidente gwoshilongo Netumbo Nandi-Ndaitwah poshigongi shimwe sha li konooli omumvo gwa yi okwa popile ta ti, oshilongo shoka itaashi vulu okwiipalutha sho shene, nena itashi vulu okwiithikamena po wo.
“Onkene oshilongo oshi na okulonga nuudhiginini, opo kaashi ka indile puushiinda. Otandi kumagidha aanafaalama ya longe nuudhiginini okuyambula po eliko lyoshilongo oshowo okukandula po ondjala moshilongo,
Itatu vulu okupopya ekandulepo lyondjala, inaatu tumbula nkene tu na okulonga opo ku kandulwe po uupyakadhi mboka hau eta ondjala, oshoka ohau kandulwa po uuna wa tulwa miilonga,” ta kumagidha ngaaka. Akumagidha kutya unene aanyasha itaya vulu oku kala yaa na iilonga, omanga ye na ompito yokwiilongela yo yene.
Nandi-Ndaitwah okwa popi kutya ngele aanyasha oya kutha ko oongaku e taya itula mo muunamapya, oyendji otaya ka hulitha po enyenyeto lyokwaa na iilonga,” ta popi ngaaka.
“Otwa pumbwa okukala tatu dhiladhila tatu endelele, okuya po noompito oshowo oondunge ndhoka tadhi tu tungu okuhuma komeho, osho wo opo tu vule okukandulapo ondjala moshilongo,’’ ta ti ngaaka. Ta gwedha po kutya uunamapya ohau pula oondunge, omadhiladhilo, oonkondo oshowo eitulemo,’’ ta popi ngaaka.
-vkaapanda@nepc.com.na