Aanilonga 28 yehangano lyokukeelela omaliko tali ithanwa Shilimela Security, posikola yoshiputudhilo shopombanda José Eduardo dos Santos mOngwediva, oya li ya tula mo ekanka ohela sho ya ningi oomwedhi mbali anuwa inaaya futwa.
Aaniilonga mboka oya ti, okwa li ya ningi oomwedhi mbali inaaya futwa, nokwa li ya futwa hugunina muJanuali nuumvo, ya li ya futwa oondjambi yomwedhi gwaDesemba omumvo gwa yi.
Omuniilonga gumwe ngoka edhina lye inaa hala lyi pitithwe okwa ti, oshimaliwa shoka osha tulwa ko ashike kominute omishona sho omutoolinkundana e ya thigi po.
“Otwa ningi ethimbo tatu mono iihuna, tatu longo nondjala oshoka inatu futwa. Ashike sho twa ndjiki oonyala mevi kutya otatu tsikile okulonga opo tatu futwa, otashi ti ngiini shoka?” ta pula ngaaka.
Omuniilonga gumwe okwa ti euvathano lyotango lya li lya tulwa po oondyoka kutya, otaya kala taya futwa momasiku 15 gomwedhi kehe, ihe nena ohaya vulu okuthika momasiku 31.
“Out na omahagano hage tu nana komwedhi, out na oohiila hadhi futwa, otwa tulwa moondjo. Nena sho oondjo dhe tu ndumbila ngika otatu ke dhi futa ngiini, ngele ohatu futwa ashike N$2 100,” ta nyenyeta ngaaka.
Ta ti, uupyakadhi mboka inau kala ashike we ya taalela, ihe naaniilonga pamwe nayo ya kalela omahangano gamwe otaya nyenyeta.
Aaniilonga oya ti, ohaya kala ye na uumbanda wokupula ko oondjambi dhawo, oshoka anuwa ngele oya pula oshimaliwa shawo ohashi tetwa, itaye shi pewa ashihe.
Omunambelewa omukuluntu gwaakeleli yomaliko posikola mpoka yo-JEDS Uesesa Katundu, okwa ti oshimaliwa opo sha tulwa ko ashike ominute omishona dha piti, konima aaniilonga ya tula mo ekanka kutya itaya tsikile okulonga omanga iimaliwa yawo inaayi lopota.
“Otwa li twa lopota meendelelo kutya otwa kalelwa kaaniilonga, ihe itaya longo iilonga yawo. Ihe kakwa li tu na shoka tatu vulu okuninga po oshoka itatu vulu okuthiminika omuntu a ka longe omanga a sa ondjala,” ta popi ngaaka.
Ta gwedha po ta ti, shoka kashi li mondjila. Ta ti, natango okwa li a lopotelwa kaanasikola kutya ohaya indilwa iikulya oshowo iimaliwa kaakeeleli yomaliko, ihe ondi uvite kutya shoka otaye shi ningi oshoka oya sa ondjala.
“Onkalo yi li ngaaka oya pumbwa okutalika ko nawa, itandi vulu okulongitha aantu taya nyenyeta ondjala, nangame otashi nyenyetele ndje” ta ti ngaaka.
Mwene gwehangano ndyoka Banda Shilimela sho a li a dhengelwa koshifokundaneki shika opo a tye ko sha, okwa popi kutya aanilonga ayehe oya mona oshimaliwa shawo konima yokathimbo ka piti.
“Mboka okwa li uupyakadhi womashina gopautekinika, sho kwa li twa lundulula omukalo gokufuta oondjambi dhaaniilonga, ihe mongaashiingeyi uupyakadhi mboka owa kandulwa po,” ta fatulula ngaaka.
Shilimela okwa li a patana kutya aaniilonga mboka inaya kala noomwedhi mbali konima, ihe oya kala ashike nomasiku omugoyi konima.
Omukalelipo gwomaliko gwehangano lyaShilimela omukuluntu posikola mpoka Kalu Hilongwa, okwa li a zimine kutya aaniilonga oya li ye na oomwedhi konima inaadhi futwa, omanga oshimaliwa shoka inaashi futwa ohela.
“’Onda li nda kambadhala okuninga omapulapulo okuza koombelewa dhetu kutya uupyakadhi owu li peni sho aaniilonga itaaya futwa oondjambi dhawo, ihe ohandi yamukulwa kutya nandi pule omuhona [Shilimela] ye mwene ta fatulula ngaaka.
Ta ti, sho kwa li a ningi onkambadhala okukonga Shilimela ye mwene, ethimbo limwe ongodhi ye ite yi kutha po, nuuna e yi kutha po, ohati ashike ote mu galukile.
“Ngame kandi na nkene ndi na okuninga, onda mono ashike aaniilonga aakwetu taya ti, yo itaya tsikile nokulonga nena[ohela],” ta popi ngaaka.
Sho kwa li a pulwa kuKundana ngele naye okwa taalela uupyakadhi ngaashi waanilonga aakwawo, okwa ti aawe, ke na nando omwedhi gu li konima inaa futwa.
– vkaapanda@nepc.com.na