WINDHOEK Aantu yane oya kwatwa ishewe metiyali kOkomisi yOkukondjitha Uulingilingi (Anti-Corruption Commission – ACC) shi nasha nomauyelele ga monika po moSocial Security Commission ge nasha nuulingilingi nuufuthi wiimaiwa. Omadhina gaafekelwa moshipotha shika inaga tseyithwa manga oshoka oye na okuholoka tango komeho gompangu. Ekwatopo lyawo olya etitha omuyalu gwaantu 26 konima sho okangundu kaantu yaheyali, mwa kwatelwa ngoka taku tiwa oye omutse guulingilingi Maxwell Spanneber ngoka a li nale omuniilonga goSocial Security Commission. Spanneberg okwa holoka nale komeho gompangu yaMengestrata moKatutura mOmaandaha. Aantu 15 ya gwedhwa po oya holokele wo mompangu metiyali komeho gaMengestrata Tuyenikalao Haikango mompangu yaKatutura shi nasha noshipotha shuufuthi nuulingilingi. Oshipotha shawo osha tsikilwa sigo omvula tayi ya. Omupehakuluntuwiliki gOkomisi yOkukondjitha Uulingilingi, Erna van der Merwe okwe shi koleke koshikundaneki Nampa kutya aafekelwa yane ya za mUuministeli wUunamapya, ehangano lyoTransNamib oshowo mOpolisi yaNamibia oya kwatwa po. Kuyele oNampa oya kundanekele kutya aantu 22 okuza moSocial Security Commission (SSC), Muni gwaVenduka, TransNamib oshowo Uuministeli wUunamapya, Omeya nOmakuti oya kwatwa po kOkomisi yOkulwitha Iilonga yUudhudhu omolwokanyala kawo miipotha yuufuthi mbyoka ya lopotwa kOpolisi yaNamibia okuza etitano lya za ko. Aantu yaheyali oya dhitikwa mEtitano omanga 15 ya mangwa po mOsoondaha. Shika oshi li oshikando shotango ongundu yaantu oyendji taya tulwa miipandeko omolwuufuthi niilonga yuulingilingi mbyoka ya monika po koACC okuza nkene ya totelwe po. Ngoka a li nale omuniilonga goSSC, Spanneberg okwa tidhilwe miilonga ta fekelelwa elongitho pambambo lyonkatu ye miilonga okushaina omaindilo giifundja. Otaku tiwa kutya Spenneberg okwa shaina ootjeke dhoka hadhi shendjwa shaa li paveta. Okwa ninga wo omaindilo giifundja okupewa omauwanawa gomiilonga ngaashi efudho lyokweehama oshowo efudho lyokupulumutha gaantu ya za miikondo nomahangano gayooloka nokupewa po okashona/oshipambu nenge okutopola naaningi yomaindilo. Inspekta Omukuluntu mOshikondo shOkunikanika uulingilingi, Philemon Masule okwa kundaneke oNampa kutya aafekelwa oyendji okwa tegelelwa ya ka kwatwe po muule womasiku omashona. Mboka ya holoka nale komeho gompangu oyo Maxwell Spanneberg, Dominiques Jahs, Daniel Rhoman, Herman Geingob, James Louw naDavid Engelbrecht. Omugandjilombo moSSC Rino Muranda okwa ti oshimaliwa shoka sha kana sigo oompaka moSSC oshi thike poodola N$340 000. Spanneberg okwa monikile ondjo shi nasha neihumbatonayi miilonga nokwa li a tidhwa mo miilonga petameko lyomwedhi nguka. Momukanda kiikundaneki ngoka gwa pitithwa koSSC kuyele otagu ti Spanneberg ota fekelwa kutya okwa li a longitha eekoonde (passwords) dhaaniilonga yakwawo nokushaina omaindilo ngoka giifundja.