Aanafaalama yiimuna oyendji monooli oye na uutile okukanitha iimuna yawo omolwenota, ngaashi ye yi kanithile omimvo dha zi ko.
Kansela gwoshikandjohogololo Uuvudhiya, moshitopolwa shaShana Timoteus Shivute okwa ti, aanafaalama yiimuna oya pumbwa okuyambidhidhwa okukandula po enota lyiimuna.
“Omeya ngoka ga li ga pombwa kuNamWater omumvo gwa zi ko okwa li ga huulile ashike pOndulu nOmongwa, ookilometa oonshona okuthika kOponona,’’ ta ti ngaaka. Ta ti, ngele omeya itaga pombwa meendelelo ga thike komatale agehe, otaga pwininine oshoka iimuna oyindji oya sa enota. Ta gwedha po ta ti, uupyakadhi mbuka owa pumbwa okukandulwa po meendelelo.
Aanafaalama yamwe oya tembukile kombinga yuumbugantu woshitopolwa shaShana, taya kongo uulithilo wiimuna yawo, omolwondjala oshowo enota lya etwa komvula inaayi loka nawa nuumvo.
George Newaka omunafaalama gwiimuna a za komukunda Uukwiyoongwe okwa ti onkalo oya nayipala, nongele otayi tsikile yi li ngaaka, otashi ka hulila nayi.
“Otwa ningi esiku tatu ningi iigongi okukundathana nkene tu na okuhupitha iimuna yetu, oshoka epangelo otali ende kashona, otwa tegelela omauvaneko galyo ethimbo nuule,” ta nyenyeta ngaaka.
Omunafaalama Sem Shivolo ota nyenyeta kutya, shoka tashi yemateke ooshoka kutya, pomahala mpoka pe na uuluthilo, pe na omwiidhi, hapo pe na omeya. Iimuna oya pumbwa okukala tayi li oomwiidhi yo tayi nu omeya ga gwana opo yi paluke.
“Otwa kanitha omukumo, nonkalo otayi ende ya uka kuuwinayi esiku kehe,” ta ti ngaaka.
Kaali Johannes ngoka e na ohambo kOmapale okwa ti omayinyengo gaantu oyendji unene koombinga dhawo, oshinima itaashi pelwa omuntu ombedhi, kehe gumwe okwa mona kutya omvula yonuumvo oya ningi po ngiini.
“Omvula ndjoka inaayi loka oya etitha omangungo gaanafaalama yiimuna okuza komalukwalo gawo okuhupitha iimuna yawo,” ta popi ngaaka.
Silas Shekutaamba oha litha mondoolopa, mOshakati momadhiya ngoka ga tulwa pokati kEhenye nEkuku oshoka komatale gwokomukunda gwawo kaku na omeya.
“Omvula oya kala ashike tayi loko moondoolopa, ihe komagumbo gomiti inayi loka ko nawa,” ta popi ngaaka.
Minista gwomauyelele omakwatathanao nuutekinika Emma Theofilus, sho a li a ningi oshigongi Osoondaha ya zi ko mOshakati okwa ti, oshimaliwa sha thika poomiliona N$100 osha tengenekwa okulongithwa muuluthilo wiimuna omanga oomilliona natango N$100 dha tengenekelwa okukandula po uupyakadhi wenota lyiimuna.
-vkaapanda@nepc.com.na