Charles Ndeumane
Uuministeli wuunamapya nuuniimuna, omeya netulululo lyomavi owi ipyakidhila nopoloyeka yo ku gandja omadheulo kaanafaalama yomiitopolwa ihetatu yomonooli opo ya mone owino nuunongo wo ku yambula po ongushu yomyama yoongombe dhawo opo ye shi pondole momangeshefelo giimuna.
Opo uuministeli wu adhe omalalakano gawo go ku yambula po ongushu yonyama yongombe, osha simana oku dheula aanafaala yomiitopolwa yomonooli opo ya endele pamwe nomilandu dhomangeshefelo giimuna, sho osho nee sha eta uuministeli wu tule miilonga opoloyeka ndjoka.
Omupopiliko guuministeli wuunamapya nuuniimuna, omeya netulululo lyomavi Simon Nghipandulwa okwa ti opoloyeka ndjoka ota yi ende niipolowa ayihe ihetatu yomonooli mbyoka ha yi ithanwa Northern Communal Areas (NCA) muunafaalama nuuniimuna, ta yi kwathele aanafaalama yomiitopolwa mbyoka opo ya mone oompito dho ku landitha iimuna yawo. “Elalakano lyopoloyeka ndjika ka li shi ashike oku tseyithila aanafaalama oompangela dhuuministeli ashike otwa hala aanafaalama yomonooli ya hulithe po oku kala ashike ya ngungunina iimuna eta ya tameke oku kala aanangeshefa yiimuna, ha ya mono iiyemo oku za miimuna yawo,” Nghipangwelwa ta ti.
Opoloyeka oyi inekelwa yi etele aanafaalama yomonooli omauwanawa ogendji ngele oya tula miilonga omadheulo ngoka ta ya pewa, ngaashi oompito dhomangeshefelo giimuna yawo, oku eta oombuto dhiimuna oombwanawa, oshowo ontseyo yo ku muna nawa nonande oku na oshikukuta.
“Iimuna oshitopolwa shopamahupilo sha simana monooli moka omagumbo ogendji ha ga hupu muunamapya nuuniimuna. Opolohalama ndjika ota yi vulu oku yambula po onkalo yomahupilo oshowo oku eta po oompito dhiilonga momikalo dha yooloka, ngaashi uulithilo woongombe, okutsela oongombe oshowo oku landa no ku landitha,” osho Nghipandulwa a popi ngaaka.
Opolohalama ndjoka oya tamekele moshitopolwa shaMusati momasiku 18 Juni 2024 no ta yi ka hulila moshitopolwa shaKunene momasiku 21 Aguste 2024.
mrndeumaneraycharles@gmail.com
Caption: Ya pewa ontseyo…Uuministeli wuunamapya nuuniimuna, omeya netulululo lyomavi owi ipyakidhila no ku dheulila aaniimuna yomonooli uunangeshefa wuumuna
Efano: Otwe li pewa