ONKANI – Omumwayinagona gwomulumentu gomimvo 33 ngoka anuwa a dhipaga aanona ye yaali, okakadhona komimvo ne osho wo okamati komimvo mbali, okwa hokolola kutya okwa tuminwa etumwalaka komulumentu ngoka kutya aanona okwe ya dhipaga. 

Oshinigwanima shoka osha holoka momukunda Onkani momundhingoloko Onakazizi moshitopolwa shaShikoto uusiku wOsoondaha. 

“Okwa tumine ndje etu mwalaka kutya aanona okwe ya dhipaga e ya thiga pooha dhoondoloma dhomeya, ihe naye ote ki idhipaga,” osho mumwayinagona Liina Shimbundu ta hokolola ngaaka. 

Ta ti okwa li a dhenge ongodhi mbala ta pula kutya okwe ya dhipaga nashike, anuwa okwe mu yamukula kutya okwe ya pondo. 

Shimbundu okwa pula kutya ihe owa tala ashike aanona yoye taya kugu ihe oto tsikile ashike? 

“Okwa yamukula ndje kutya kape na ngoka a kugu, ayehe onde ya pondo ashike ya mwena,” ta ti ngaaka. 

Ta hokolola kutya sho ya kala koWindhoek, oya ndhindhilika omanyenyeto gaaholike mboka olundji, unene tuu ngele ya nwa iikolitha. 

Shimbundu okwa ti, omanga ine ya naanona kOwambo okwa zi ko sho a li ta kondjitha okumangeleka yina yaanona ngoka a li e shi pondola okumatuka po. 

“Mpoka opo nee a zi ya topolwa kopolisi e te ya kOwambo naanona oshoka okwa li taye ya kondjele ayehe,” ta ti ngaaka. 

Shimbundu okwa ti, naye okwa li e mu lombwele kutya ota tukwa kusuwala ye omumwayi gwa yina yaanona kutya haye he yaanona. 

Yina yomufekelwa, Selma Thomas gwomimvo 61 okwa ti omwanamati okwa kala e na ombepo ondhigu, ta ti ke na nando omikalo omiwanawa. 

“Oshike e na okudhipaga aatekulu yandje, aanona oye mu ninga shike, oshike ina idhipaga ashike ye mwene?” Ta pula nomahodhi taga popoloka. 

Thomas okwa ti omwanamati okwa thiki Etitano naanona ye, ta lombwele yina kutya okwe ya eta kuye oshoka kayii uvite nayina yaanona, shoka anuwa sha li sha nyanyukitha omukulupe. 

Ta ti, onde mu pandula kutya aantu ohaya fala aanona komagumbo, ashike nani oku na ngaa etompelo ndyoka lye mu enditha. 

“Opaife ashike ndi shi wete kutya nani okwa kala ena omandhilandhilo gokudhipaga aanona oshoka okwa kala e na ohole nayo unene, ina hala ya za po puye okwa hala ashike ye mu kalela yo ye mu landula kehe mpoka ta yi,” omukulupe ta hokola. 

Ta ti, nani omumati oku na ashike edhilaadhilo lyokudhipaga aanona ye. Omukulupe okwa hokolola kutya ka li mo megumbo sho a kutha mo aanona. 

“Sho twa pula aanona mboka ya li nayakwawo megumbo, oya ti anuwa okwa ithana ashike oyana ta ti naya ye naye e ya thindhikile kokapate ya ye kuyina, nani okwa yi ashike melundu moka e ya dhipagele,” ta hokolola ngaaka. 

Omulumentu gumwe gwopomundhingoloko mpoka okwa ti ye okwa tuminwa etumwala kutya na ka tale ko omidhimba dhaanona komandoloma gomeya manga inaadhi lika po koombwa, ye ota ka imangeleka. 

“Onda li nde mu lombwele kutya ina ninga shoka ta dhiladhila, po opo nee mpoka a zi po i ifale kopolisi kOkatope,” ta popi ngaaka. 

Ta ti anuwa okwa kala ta hokolola kutya okuuvite nayi tu ulwa kusuwala ye omumwayina gwayina yaanona kutya haye he yaanona, ye te mu tuku iitya iinene. 

Omulumentu ngoka okwa ti okwa kala te mu kumagidha kutya ayihe na ekele kombunda, ihe nani ita pulakene. 

“Ongulohi yOsoondaha sho a zi poondingosho okwa zi po ta lili, u uka kegumbo hoka a ka longa iilonga yi li ngaaka,” ta hokolola ngaaka. 

Omumwayinagona gwomufekelwa Otto Uusiku okwa indile moshigwana ngele otashi vulu okuyambidhidha mpoka tashi vulu opo ku longekidhwe efumbiko lyaanona mboka yaali. 

“Ngaashi mu shi wete ngaaka omukulupe iha longo okwa ikolela ashike mopenzela ye, otwa pumbwa omayambindhindo lela,” ta indile ngaaka. 

Uusiku okwa ti onkundana ndjoka oye ya uvitha nayi noonkondo. 

-vkaapanda@nepc.com.na