Aantu ye li 11 anuwa otaya pulwapulwa shi na sha nomadhipago gaanona yaakadhona yatatu kOkahandja.
Rosalind Ndinelao Fabian gwomimvo hamano, Ingrid Maasdorp gwomimvo ntato, osho wo Beyoncé (15) oya si omaso ga nyanyaleka omasiku ga yooloka sho ya longelwa iilonga inayi uka omanga inaaya dhipagwa, nomalutu gawo oga itsuwa ge ekelwahi.
Maasdorp osho wo Fabian okwa li haya hiti osikola ko-KW von Marees Combined, noya li ya dhipagwa omasiku ga yooloka.
Omalutu gawo oga li ga adhika momudhingoloko Verdesdal, omanga olutu lwa !Kharuxas lwa adhika lwa tetwa iilyo yolutu yimwe.
Omupevikuluntu gwopolisi moshilongo Elias Mutota okwa koleke kutya aantu ye li 11, otaya pulwapulwa shi na sha nomandhipago ngoka ga holoka kOkahadja omasiku ga zi ko.
“Oshipotha shotango oshi na aantu ye li yane otaya pulwapulwa, noshipotha oshitiyali aantu ye li yatano otaya pulwapulwa omanga aantu ye li yaali taya pulwapulwa shina sha noshipotha oshititatu,” ta fatulula ngaaka.
Ta ti, opolisi otayi longo nuudhiginini opo ku mangwe mboka taya longo iilonga ya tya ngaaka moshigwana.
Omupresidente Netumbo Nandi-Ndaitwah sho a li a popitha aakwanezimo yoonakusa Osoondaha okwa ti, Okahandja otaka tameke nokangendjo kegameno.
“Opolisi yaNamibia otayi longo nuudhiginini okugamena oshigwana kiiningwanima yi li ngaaka oshowo ku mangwe mboka ya dhipaga aanona mboka,” ta kwashilipaleke ngaaka.
Nandi-Ndaitwah ngoka a li a ende pamwe naaleli yopombanda yamwe, okwa li a holola euvonayi kwaashoka sha ningilwa aanona aashona.
Ta ti, otashi uvitha nayi, nosha eta uumbanda maanona yosikola osho wo aavali moshilongo.
“Otandi indile oshigwana opo shi kale shi holathane nokuhulitha po iiningwanima yi li ngeyika, opo wo okanona Okanamibia ka kale ka manguuka moshilongo shako, ihe hakulongelwa omiyonena ngaashi ndhoka,” ta indile ngaaka.
Omutse gwoshilongo Nandi-Ndaitwah ta ti, Namibia na kale oshilongo shombili.
Iiningwanima mbyoka oya li yu uvitha nayi oshigwana, noyendji oya holola euvonayi okupitila komalungula moshilongo ashihe, yamwe oya iyamba okutula po oshimaliwa opo ngoka e na uuyelele a lopotele opolisi.
Oshimaliwa ngashiingeyi osha thikama poN$50 000, nopolisi otayi indile kehe ngoka e na uuyelele a lopotele opolisi yi li popepi.
-vkaapanda@nepc.com.na