Opolisi yaNamibia oya manga aantu ye li 142, ya adhika niingangamithi yomaludhi ga yooloka moshilongo ashihe, momukokomoko gwomwedhi gwaSepetemba ashike.
Omupopiliko gwopolisi yaNamibia Deputy Commissioner Kauna Shikwambi okwa ti, iingangamithi mbyoka ya kwatwa ko ongaashi epangwe lyookilogalama 195, 620, oopela dhomandrax dhi li 689 ococaine yuusila yoogalama mbali oshowo uukuma woococaine wu li 421.
“Iingangamithi ayihe mbyoka oya kwatwa ko moondoolopa dha yooloka, naafekelwa oya mangwa po” ta ti ngaaka. Ta ti, maantu mboka ya mangwa niingangamithi, ayehe kumwe ye li 142 oya kwatela mo Aanamibia 137, Omuangola gumwe, Omutanzania gumwe oshowo Aazambia yatatu.
Shikwambi okwa popi ta ti, elongitho lyiingangamithi otali indjipala unene moshilongo, shoka tashi teyagula po onakuyiwa yaanyasha.
“Aanyasha ohaya ningi iihakanwa yiingangamithi nuupu oshoka kaye na oonkondo dha gwana okutinda iingangamithi mbyoka haya hekelwa kwaamboka taye ga landitha,” ta ti ngaaka. Omolwuupyakandhi wiingangamithi mboka tau indjipala noonkondo, opolisi oya kala nokugandja omalongo miitopolwa ya yooloka, kombinga yuupyakadhi wiingangamithi mokati koshigwana, nuunene maanyasha nomaalongwa yosikola.
Risto Shaduka gomolukanda Oneshila mOshakati moonkundathana noshifokundaneki shika okwa ti oku shi okuhokolola uupyakadhi wiingangamithi oshowo iikolitha.
“Iinima mbyoka oya teyagula po onkalamwenyo yandje, ngeno hasho ndi li ngeyi,” ta ti ngaaka.
Ta ti, okwa li a kanitha iilonga ye omolwiikolitha oshoka kehe esiku oku li ashike kohi yiikolitha. “Otandi kumagidha ashike kehe ngoka ta longitha iiteyipo yaantu mbyoka a konge omakwatho gomondjila. Osha li sha pula ndje shili ethimbo neyidhidhimiko opo ndi thige po iinima mbyoka ashike nena onda pandula onkalalamwenyo yandje oya ninga ombwaanawa,” ta hokolola ngaaka. Martha Shikoyeni omuhungimwenyo gomolukanda Evululuko okwa ti okwa ndhindhilike kutya iingangamithi oyo uupyakadhi uunene mokati koshigwana.
“Onda ningi omimvo 12 tandi longo nomaupyakadhi ga yooloka, ihe uupyakadhi owundji ohau etwa uuna gumwe a longitha iingangamithi, unene momalukanda iingangamithi otayi dhana onkandangala,” ta hokolola ngaaka. Ta ti, aanona yosikola oya ninga iihakanwa, noyendji oya kanitha eitulemo moosikola. “Ohandi ithanwa olundji ndi ka popye naanona ya kanitha omikalo momagumbo, ihe oyendji oye li momakwatathano giingangamithi,” ta ti ngaaka.
Shikoyeni okwa ti aanona ye li kohi yomimvo 15 oya yonagula oonkalamwenyo dhawo niikolitha oshowo iingangamithi. “Shika osha eta omaipumomumwe momagumbo oshowo yamwe ya hulitha po okuya kootundi,” ta ti ngaaka.
Otandi kumagidha aanona, unene aanyasha ya konge omakwatho kaahungimwenyo oshowo koondohotola uuna ye wete ya nyengwa okuhulitha po iiningwanima mbyoka.
-vkaapanda@nepc.com.na