Opolisi oya lopota aantu ya kanitha oomwenyo dhawo moshiponga shohauto omasiku mehuulilo shiwike.

Otaku hokololwa kutya aantu yane oya si moshiponga shohauto molukanda  Orutjandja momudhingoloko Opuwo moshitopolwa shaKunene.

Oshiningwania shoka anuwa osha holoka Osoondaha lwopotundi 03h00. Oshiponga shoka anuwa osha holoka sho ohauto yoToyota Fortuner yiidhenge omutse mumwe nohauto yoAudi osiliveli sho kwali tadhi pingathana.

Opolisi oya ti aantu ayehe yali mohauto yoAudi aalumentu yaali nomukiintu gumwe no hanona oya hulithile poshiponga mpoka, omanga omuhingi gwoFortuner a li a falwa a ka mona uuhaku koshipangelo.  Moshiningwanima shimwe shafaathana aantu yatano oya si sho okabesa koQuantam kali ka galangata konima kiidhenge mondoongi.

Otaku hokololwa kutya oshiningwanima osha holoka Omandaaha kOmakange moshitopolwa shaKunene. Aafalelwa yane natango oya hupu moshiponga shohauto sho anuwa ohauto yali ya londo muyo yali ya galangata iikando oyindji. Omuhingi okwa hulithile poshiponga. Otaku hokololwa kutya oshiningwanima osha holoka mehuulilo shiwike kOsire moshitopolwa Otjozondjupa.

Aafalelwa mboka anuwa okwali yuumbwamo mohauto sho ya galangata.

Oshigwana osha kala nokukumagidhwa shi longithe nawa omandhindhiliko gomoondjila okuyanda iiponga hayi holoka unene pethimbo ndyoka lyokili nomumvo omupe. “Otwa hala ethimbo ndyoka lyi kale lyaa na iiponga ya sha, sho shoka tatu kumagidha aahingi yiihauto ya simaneke omandhindhiliko oshowo ya hinge nuukeka,” opolisi ya ti ngaaka.

Ehangano lyoMVA olya ti, okuhinga nuukeka oshowo nethimbo olyo etokolo lyomondjila oshowo onkalo yoku yanda iiponga moondjila.

Ta yati, uuna oshiponga sha holoka mondjila dhenga konomola yopolisi 10111 nenge MVA 9682 ndyoka itayi pula oshimaliwa kongokondhi.

– vkaapanda@nepc.com.na