WALVIS BAY – Omaso ashike gaantu yatano ga tseyithwa moshitopolwa Erongo pethimbo lyefudho, nonando oshiketha shokuyakula mboka ya mona iiponga miiyenditho nenge Motor Vehicle Accident Fund [MVA] okwa tseyitha kutya okuza mo 22 November sigo 1 January 2014 iiponga 361 yomoondjila oya ningwa, moka mweehamekelwa aantu 762 naantu 74 ya silemo.
Poshigongi shiikundaneki Etitano lya yi shinasha niilonga yomiyonena. Omunambelewa kwatakanithi mokukondjitha omiyonena moshitopolwa Erongo Erastus Iikuyu okwa lombwele Kundana kutya oveta nelandulathano oya li ya kalekwapo nawa moshitopolwa shoka.
“Elanditho lyomalovu shaa li paveta olya li limwe lyomaupyakadhi noshowo omaihumbato omawinayi komunkulofuta pOmbaye nOshiwakopo, oga li ga lopotelwa opolisi.Tse notwa tumuko aapolisi komahala ngoka,’ Iikuyu a ti.
Okwa tsikile a ti oongeshefa oonene nadho odhina ondjo melanditho lyomalovu pethimbo lyefudho. ‘Kakele komaso moondjila dhoshilongo ngoka woo ga li pevi okuyeleka nomumvo 2012. Otandi koleke kutya aatalelipo noshowo aakalimo moshitopolwa Erongo oya li yiihumbata nawa. Ooyene yoondingosho dhomalovu, ookluba, noombaa nayo oya gandja elongelokumwe kopolisi, na otwa mono kutya yo oya li taya iyutha kootundi dhawo dhoku pata nokupatulula,’osho a lombwele Kundana.
Eso lyotango moshiponga shomoondjila moshitopolwa Erongo olya lopotwa momasiku 8 December sho omuntu gumwe asi nayane yeehamekwa moshiponga pokati ko Karibib nUsakos.
Iikuyu okwa ti omunamimvo 35 Nicodemus Angunga, omukalimo gwomoSingela ya Shiwakopo okwa si momasiku 28 December 2013, sho omuhingi gwohauto yoludhi lwo Peugeot , Bernard Fillipus a kanitha epangelo lyosheenditho she naashika osha kandoma . Angunga okwa ehamekwa momutse nokwa hulithile mpoka pwa ningilwa oshiponga.
Iikuyu okwa ti Fillipus okwa li ta zi ko Nonidas, ndjoka yili ookilometa dhontumba okuza moShiwakopo sho oshiponga shoka sha ningwa.
Ota ku hokololwa kutya omuhingi nguka okwa ndopa okuthikama positopa yopomataagulukilo golutenda.Okwa kanitha epangelo lyosheenditho shoka a li ta hingi.
Aakalimo ayehe yane mboka ya li mosheenditho oya umbwamo. Aafaalelwa yaali mboka yeehamekwa oya taambelwa moshipangelo sha Shiwakopo.Fillipus ngoka a li ta hingi keena ombapila yoku hinga okwa holokele mompangu yamengestrata ta tamanekelwa okuhinga keena ombapila, edhipago lyaashi lyoshiningilewina, noshowo ta hingi a kolwa.
Mesiku olyo tuu ndyoka omunamimvo 56 Sofia Hedwig Lutula okwa si konyala ookilometa heyali okuza mondjila onene pokati koHentiesbay ba Spitskoppe moshitopolwa Erongo.
Pahapu dha Iikuyu omuhingi gwosheenditho shoka, Martin Namaseb okwa kanitha okondolola yasho shoka nosha kandoma. Mosheenditho omwa li aafaalelwa yeli omugoyi, yamwe yomwaambaka oya pangwa moshipangelo shepangelo sha Usakos.
Opolosi otayi konakona edhipago lyaashi lyoshiningilewina.
Omukwashigwana gumwe gwa South Africa, Casperus Aucamp, okwa si momasiku 31 December 2013 pomadeina poLong Beach sho aniwa a gu kepakapaka eta ehama othingo.
Mesiku lyotango lya January 2014 omunamimvo 22 Abraham Petrus okwa sile mondjila sho a pumwa kotaxi ookilometa ntano okuza mOmbaye.
Iikuyu ota hokolola kutya nakusa na kuume ke oya li ta ya zi koLong Beach sho ohauto yawo ya pu omahooli. Nakusa Petrus aniwa okwa li a thigwapo kumukwawo ngoka a li a ka konga omahooli. Opwa itaalwa kutya nakusa okwa li a kolwa na okwa pumwa kotaxi omanga a li ta kambadhala oku konga olefa opo a shune koVenduka.
Ku Eveline de Klerk