ONGWEDIVA – Aakalimo ye na uulema mOngwediva Etiyali oya li ya nyanyudhwa nomwihwa nokupewa omagano gOkili kelelo lyondoolopa lyaNgwediva.

Omugandji gomauyelele melelo lyondoolopa lyOngwediva Ottilie Shingenge okwa ti nuumvo oya hogolola okuningila aantu taya lumbu nuulema wa yooloka okili, oshoka oya hala nayo yu uve ombili.

“Olundji otwa kala tatu ningile okili aakulupe, ihe nuumvo otwa tokola tu ningile aantu ye na uulema oshoka inatu shi ya ningila nale, natango omumvo tagu ya otatu ka ningila wo yalwe oshoka otwa hala kehe gumwe u uve uugumbo wuukalimo womOngwediva,” ta fatulula ngaaka.

Shingenge okwa ti oya gandja omagano kaantu ye na uulema ye li 100 noya longitha oshimaliwa shi thike poN$60 000. Ta ti, aantu ye na uulema oye na uukwatya wi ikalekelwa onkene osha simana ngele taya uvithwa nawa, yo ya mone kutya nayo oya simanekwa ngaashi aantu ayehe. Martha Shivute ngoka a taamba ko omagano gomona okwa ti oku uvite nawa sho ya tothwa mo mokati kaantu ye na uulema.

“Aantu hayo ashike mbaka  ye na uulema mOngwediva ayihe, ashike okwa tothwa mo ashike yamwe, sho osho shoka tandi ti, otse aanelago okumona omagano ngaka,” ta pandula ngaaka.

Ta pandula ye ta ligola, ta ti elelo lyondoolopa nali tsikile oku shi ningila wo yalwe.

Simson Petrus ngoka a pewa omagano esiku ndyoka okwa ti shika oshikando shotango ta pewa omagano gokili, onkene okwa nyanyukwa.

“Naakwanezimo yandje ihaye shi ningile ndje. Olundji ohandu uvu ashike aakulupe taya ningilwa okili kelelo lyondoolopa, nani esiku lyetu lya longekidhwa osho lya thikana,” ta popi ngaaka.

Ayehe ya li poshituthi mpoka oya li taya ulike enyanyanyu, naanona taya matuka yu uvite ombili ye na iiyimati pomake. -vkaapanda@nepc.com.na