Charles Ndeumane

ONGWEDIVA – Omukuluntu gwopolisi moshitopolwa shaShana Naftal Lungameni-Sakaria okwa ti aakwashigwana otaya nyenyeta komayakulo ngoka haya pewa kaanambelwa yopolisi aakiintu uuna ya yi koosasiyona dhopolisi osho wo pangodhi.

Sha landula omakemo gaakwashigwana kombinga yomayakulo ga nkundipala ngoka haya pewa kaanambelwa yopolisi aakiintu, komanda Sakaria okwa hiya oshigongiilonga showina shaapolisi aakiintu moshitopolwa shaShana shoka sha ningwa ohela mOngwediva.

Oshigongiilonga osha gongele aanambelewa yopolisi aakiintu okuza koosasiyona adhihe dhopolisi moshitopolwa shaShana. Oshigongiilonga shoka ohashi ningwa lumwe kehe omumvo, moka aapolisi aakiintu haya kundathana omashongo ngoka ya taalela oshowo okupukulula shoka sha pumbwa epukululo.

Sho a li ta popi moshigongiilonga shoka, Sakaria okwa ti aanambelewa yopolisi aakiintu otaya nyengwa okutunga omakwatathano omawanawa naakwashigwana nolundji ohaye ya ngwanyagula. Ta ti osha simana opo aapolisi ya kale mekwatathano ewanawa naakwashigwana opo ya longele kumwe nuupu.

“Oshigongiilonga shika osha etithwa komanyenyeto ogendji ngoka handi mono okuza kaakwashigwana ngele tashi ya komayakulo ngoka haya pewa kaanambelewa yopolisi, unene ngaa mboka yaakiintu kondandalunde. Nonande otatu pandula oyendji mboka ye na ondjungu miilonga yawo, ye na oshimpwiyu yo oye li pambelewa, itatu vulu okweetha iiningwanima iishona moka aanambelewa inaaya longa pamuthika gwopombanda ngoka twa tula po ongoshitopolwa shaShana,” Sakaria ta ti.

Okwa tsikile ta ti oshinakugwanithwa shawo ongaanambelewa yoveta okuyakula nokukaleka po oveta, noshinakugwanithwa shoka oye shi inekelelwa unene kaakwashigwana onkene kehe shoka taya ningi otashi gandja efano lyontumba koshigwana shoka haya yakula ongoohandimwe osho wo etanga alihe lyagameno.

“Nonande pu na omanyenyeto ngoka taga zi koshigwa kombinga yomayakulo gaanambelewa yopolisi aakiintu, onda hala oku mu pandula oshoka aapolisi aakiintu ihaya kutha ombinga miinima kaayi li paveta unene ya fa aanambelewa yopolisi aalumentu. Nande owa tala omwaalu gwaapolisi mboka ya mangwa nokutulwa mondholongo molowiimbuluma oto mono kutya aapolisi aakiintu ihaya kutha unene ombinga miimbuluma,” osho Sakaria a tsikile ngaaka.

Omupevikuluntu gwopolisi moshitopolwa shaShana Elizabeth Nashandi elalakano lyoshigongiilonga shoka okupukululatha ongaakiintu ye li metanga lyegameno. 

“Ongomunambelewa omukuluntu gwopolisi onda mono omanyenyeto ogendji okuza kukomanda gwetu gwopolisi moshitopolwa shaShana kombinga yomaihumbato gaapolisi aakiintu ngoka ha mono oku za kaakwashigwana. Sho osho nee sha eta tu ninge oshigongiilonga shika opo tu longathaneni tse tu pukululathaneni ongaakiintu tu li metanga lyegameno,” Nashandi ta ti. –mrndeumaneraycharles@gmail.com