OSHAKATI – Omupresidente Netumbo Nandi-Ndaitwah okwa kumagidha aapolisi mboka ya mana omadheulo goomwedhi omugoyi gopolisi opo ya longe yi itula mo yo ya shunithe pohi iimbuluma mbyoka yi li pombanda moshilongo.

Omutse gwoshilongo okwa  kumagindha ngaaka Etitano sho aapolisi ye li 1 779 ya ningilwa oshituthipititho shawo mOshakati, pokapale kemanguluko.

“Omakwatokoonkondo, omadhipagathano, omayugo osho wo iimbuluma yilwe otayi holoka moshilongo, notayi indjipala kehe siku,” ta popi ngaaka. Omupresidente okwa gandja oshiholelwa shiiningwanima ya holoka kOkahandja omasiku gazi ko, ta ti nayi mone ehululi. 

Ta kumagidha ta ti, ngele oya longo yi itula mo otaya vulu okweeta elunduluko ndele iimbuluma tayi hulu po. Nandi-Ndaitwah okwa ti okuninga oshilyo shopolisi kashi shi osimpu yo wala, ihe okulongela oshigwana shoka shili mondjila noku keelela iinima inayi uka. 

Kakukutu komatanga gopolisi Joseph Shikongo esiku ndyoka okwa pandula ayehe ye shi pondola momadheulo gawo.

“Otandi kumagindha amuhe mu longe nuuyuki, opo wo nane esiku limwe mu ka lele ngaashi naana aakuluntu yopolisi ya thikama mpaka nena,” ta kumagidha ngaaka.

Aapolisi aape yeli a ngala 20 esiku ndyoka oya pewa omapapa sho anuwa ya kala noku shi enditha nawa momadheulo gawo. 

Monica Bosco yina yomupolisi gumwe opo a mana omadheulo ge okwa ti, ita mana okuligola nokupandula.

“Omumati gwandje ngoka oye ta kala ta e ta omboloto megumbo oshoka onkalo twa taalela kayishi okuhokololwa. mOshiwambo ohaku ti, Kalunga iha dhipagelwa oyana, ashike oshoshili,” ta po pi nomahodhi taga tondoka.

Oshituthipitithi shoka osha gongalwa kaanenentu okuza komutumba gwopashigwana osho wo yamwe ya zi koshishindalongo Angola. 

– vkaapanda@nepc.com.na