Omupresidente Netumbo Nandi-Ndaitwah ota pititha mo iilyo iipe yi li 270 yoshikondo shomazulonkalo noondholongo nena kOmaruru. 

Oshiindingili shoka otashi ningilwa kehala lyomadheulilo tali ithanwa koLucius Sumbwanyambe Mahoto nena. 

Omugandji gwomauyelele gwoshikondo shomazulonkalo Comissioner Salmi Hangula okwa pititha kutya mboka taya pitithwa mo oomboka ya mana omadheulo gawo goomwedhi omugoyi. 

Ta ti iilyo iipe otayi ka ulika uunkulungu wawo osho wo shoka ya kala nokudheulilwa ethimbo ndyoka. Ta gwedha po kutya oya dheulwa nawa noya longekidhwa nawa okutameka iilonga yawo. 

Nandi-Ndaitwah oshiwike shaziko natango okwa pitithamo iilyo yetanga lyopolisi yi li 1 779 sho ya ningilwa oshituthipititho shawo mOshakati, pokapale kemanguluko. 

Omutse gwoshilongo okwa li a kumagidha aapolisi mboka ya mana omadheulo goomwedhi omugoyi kutya okuninga omupolisi kashi shi ashike ekandulepo lyonkalo yokwaa na iilonga ashike okuyakula oshilongo mpoka tashi pumbwa omayakulo gawo. 

E ya kumagidha kutya naya longe ya itula mo yo ya shunithe pohi iimbuluma mbyoka yi li pombanda moshilongo. 

“Omakwatokoonkondo, omadhipagathano, omayugo osho wo iimbuluma yilwe otayi holoka moshilongo, notayi indjipala kehe siku,” ta popi ngaaka. 

Okwa li wo a gandja iiholelwa yiiningwanima iiwinayi tayi holoka moshilongo. 

-vkaapanda@nepc.com.na